യുവതിക്ക് ദാരുണാന്ത്യം, അപകടം വഴി ചോദിക്കാന് ബൈക്ക് നിര്ത്തിയപ്പോള് കെഎസ്ആര്ടിസി ബസ് ഇടിച്ച്
കോട്ടയം: കെഎസ്ആര്ടിസി ബസും ബൈക്കും കൂട്ടിയിടിച്ച് യുവതിക്ക് ദാരുണാന്ത്യം. ബുധനാഴ്ച ഉച്ചയ്ക്ക് രണ്ട് മണിയോടെ വെച്ചൂര് - തണ്ണീര്മുക്കം റോഡിലെ അംബിക മാര്ക്കറ്റ് ജംഗ്ഷന് സമീപമാണ് അപകടമുണ്ടായത്. പത്തനംതിട്ട മല്ലപ്പള്ളി ആനിക്കാട് സ്വദേശി പി.എ വര്ഗീസിന്റെ മകള്സ്മിത സാറാ വര്ഗീസ് (44) ആണ് അപകടത്തില് മരിച്ചത്. തണ്ണീര്മുക്കത്ത് നിന്ന് വെച്ചൂരിലേക്ക് വരികയായിരുന്നു സ്മിത വര്ഗീസ്.
വഴി ചോദിക്കാനായി റോഡരികില് ബൈക്ക് നിര്ത്തിയ ശേഷം അവിടെ നിന്ന ഒരാളോട് സംസാരിക്കുകയായിരുന്നു. ഈ സമയം തൊട്ട് പിന്നാലെയെത്തിയ ബസാണ് യുവതിയെ ഇടിച്ച് വീഴ്ത്തിയത്. സ്റ്റോപ്പില് നിന്ന് ആളെ കയറ്റിയ ശേഷം ബസ് മുന്നോട്ട് എടുത്തപ്പോഴാണ് അപകടമുണ്ടായത്.
പരിക്കേറ്റ സ്മിതയെ നാട്ടുകാര് ഉടന് ഇടയാഴത്തെ കുടുംബാരോഗ്യ കേന്ദ്രത്തില് എത്തിച്ചെങ്കിലും ജീവന് രക്ഷിക്കാനായില്ല. മൃതദേഹം വൈക്കം താലൂക്ക് ആശുപത്രി മോര്ച്ചറിയിലേക്ക് മാറ്റി. വൈക്കം പോലീസ് മേല്നടപടികള് സ്വീകരിച്ചു. അമ്മ: പൊടിയമ്മ ശാമുവല്. ഭര്ത്താവ്: ദയാസ് മാത്യു. പിറവം മൊട്ടപ്പറമ്പില് കുടുംബാംഗം. മകള്: ജൂലി സാറാ ദയാസ് മാത്യു. സഹോദരന്: സുമിത് ഏബ്രഹാം (യുഎസ്എ).