പട്ടാമ്പിയിൽ ഗുഡ്‌സ് ട്രെയിൻ പാളംതെറ്റി അപകടം; രണ്ട് ട്രെയിനുകൾ ഭാഗികമായി റദ്ദാക്കി

പാലക്കാട്: പട്ടാമ്പി പള്ളിപ്പുറത്ത് ഗുഡ്സ് ട്രെയിൻ പാളംതെ​റ്റി അപകടം. മംഗലാപുരത്തുനിന്ന് പാലക്കാട്ടേക്കുവന്ന ട്രെയിനാണ് പാളംതെ​റ്റിയത്. ഇതിനുപിന്നാലെ നാല് ട്രെയിനുകൾ വിവിധയിടങ്ങളിലായി പിടിച്ചിട്ടിരിക്കുകയാണ്. ഇന്ന് രാവിലെ 11.30ഓടെയായിരുന്നു സംഭവം. മൂന്നാം ട്രാക്കിൽ നിന്ന് നാലാം ട്രാക്കിലേക്ക് മാറുന്നതിനിടെ ട്രെയിനിന്റെ ഒരു ബോഗി തെന്നിമാറുകയായിരുന്നു. ഷൊർണൂരിൽ നിന്നെത്തിയ എഞ്ചിനീയർ സംഘം ട്രാക്കിൽ നിന്ന് ബോഗി മാ​റ്റിയെങ്കിലും ഒന്നരയോടെയാണ് ഗതാഗതം പുനഃസ്ഥാപിക്കാനായത്.

ഏറനാട് എക്‌സ്‌പ്രസ്, പരശുറാം എക്‌സ്‌പ്രസ് ,ജനശതാബ്ദി, കൊച്ചുവേളി എക്‌സ്‌പ്രസ്, തിരുവനന്തപുരം എക്‌സ്‌പ്രസ് എന്നിവയാണ് 30 മിനിട്ടുവീതം വൈകുന്നത്. രണ്ട് ട്രെയിനുകൾ ഭാഗികമായി റദ്ദാക്കിയിട്ടുണ്ട്. കോഴിക്കോടുനിന്നും പാലക്കാട്ടേക്കുവരുന്ന പാസഞ്ചർ ട്രെയിൻ, പാലക്കാടുനിന്ന് കണ്ണൂരേക്കുപോകുന്ന ട്രെയിൻ എന്നിവയാണ് റദ്ദാക്കിയിരിക്കുന്നത്.