'കണക്ട് ടു വർക്ക്' പദ്ധതിക്ക് ഇന്ന് തുടക്കം

തിരുവനന്തപുരം: പഠനം പൂർത്തിയാക്കി തൊഴിലന്വേഷിക്കുന്ന യുവതി- യുവാക്കൾക്ക് കൈത്താങ്ങാകുന്ന 'മുഖ്യമന്ത്രിയുടെ കണക്ട് ടു വർക്ക്" പദ്ധതിക്ക് തുടക്കമാകുന്നു. പദ്ധതിയുടെ സംസ്ഥാനതല ഉദ്ഘാടനം ഇന്ന് വൈകിട്ട് 4ന് തിരുവനന്തപുരം നിശാഗന്ധി ഓഡിറ്റോറിയത്തിൽ മുഖ്യമന്ത്രി പിണറായി വിജയൻ നിർവഹിക്കുമെന്ന് മന്ത്രി വി.ശിവൻകുട്ടി വാർത്താസമ്മളനത്തിൽ അറിയിച്ചു.വിദ്യാഭ്യാസത്തിനുശേഷം മത്സരപ്പരീക്ഷകൾക്കോ,​ നൈപുണ്യ പരിശീലനത്തിനോ തയ്യാറെടുക്കുന്ന ഉദ്യോഗാർത്ഥികൾ അനുഭവിക്കുന്ന സാമ്പത്തികവും മാനസികവുമായ സമ്മർദ്ദം കുറയ്ക്കുകയാണ് പദ്ധതിയുടെ ലക്ഷ്യം.അർഹരായ ഉദ്യോഗാർത്ഥികൾക്ക് പ്രതിമാസം 1,​000 രൂപ വീതം ഒരു വർഷത്തേക്ക് ധനസഹായം ലഭിക്കും.പ്ലസ് ടു, വി.എച്ച്.എസ്.ഇ, ഐ.ടി.ഐ, ഡിപ്ലോമ, ബിരുദം എന്നിവ പാസായ,​ 18 മുതൽ 30 വയസുവരെ പ്രായമുള്ളവർക്ക് അപേക്ഷിക്കാം.കുടുംബ വാർഷിക വരുമാനം 5 ലക്ഷം രൂപയിൽ താഴെയായിരിക്കണം.നാഷണൽ എംപ്ലോയ്‌മെന്റ് സർവീസ് വകുപ്പിന്റെ പോർട്ടലായ eemployment.kerala.gov.in വഴി ഉദ്യോഗാർത്ഥികൾക്ക് അപേക്ഷിക്കാം.