രാജീവ്  ചന്ദ്രശേഖറിന് നന്ദി അറിയിച്ച് പിണറായി വിജയൻ; കത്ത് പങ്കുവച്ച് ബിജെപി സംസ്ഥാന പ്രസിഡന്റ്

തിരുവനന്തപുരം: മുഖ്യമന്ത്രി പിണറായി വിജയന്റെ കത്തിന് നന്ദി അറിയിച്ച് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖർ. സംസ്ഥാനത്തിന്റെ പേര് 'കേരളം' എന്ന് ഔദ്യോഗികമായി പുനഃസ്ഥാപിക്കുന്നതിനായി നിയമസഭയിൽ പാസാക്കിയ പ്രമേയത്തിന് രാജീവ് ചന്ദ്രശേഖർ പിന്തുണ അറിയിച്ചിരുന്നു. ഇതിന് നന്ദി അറിയിച്ച് മുഖ്യമന്ത്രി രാജീവ് ചന്ദ്രശേഖറിന് കത്തയച്ചിരുന്നു. ഈ കത്ത് പങ്കുവച്ചാണ് രാജീവ് ചന്ദ്രശേഖർ നന്ദി അറിയിച്ചിരിക്കുന്നത്. കേരളം എന്ന പേര് നമ്മുടെ ചരിത്രത്തെയും ഭാഷയെയും വേരുകളെയും പ്രതിഫലിപ്പിക്കുന്നതാണ്. ആ പേര് പുനഃസ്ഥാപിക്കുക എന്നത് നമ്മുടെ പൈതൃകത്തോടുള്ള ആദരവിന്റെ അടയാളം കൂടിയാണെന്ന് രാജീവ് ചന്ദ്രശേഖർ കുറിച്ചു.

പോസ്റ്റിന്റെ പൂർണരൂപം

മുഖ്യമന്ത്രി പിണറായി വിജയൻ ജി, താങ്കളുടെ കത്തിന് നന്ദി.

'കേരളം' എന്ന പേര് നമ്മുടെ ചരിത്രത്തെയും ഭാഷയെയും വേരുകളെയും പ്രതിഫലിപ്പിക്കുന്നതാണ്. ആ പേര് പുനഃസ്ഥാപിക്കുക എന്നത് നമ്മുടെ പൈതൃകത്തോടുള്ള ആദരവിന്റെ അടയാളം കൂടിയാണ്. കേരളത്തിന്റെ പാരമ്പര്യവും സംസ്കാരവും വിശ്വാസവും സംരക്ഷിക്കുന്നതിനായാണ് ബിജെപി/എൻഡിഎ എക്കാലവും നിലകൊണ്ടിട്ടുള്ളത്. എന്നാൽ ദൗർഭാഗ്യവശാൽ, ഈ മൂല്യങ്ങളെയും വിശ്വാസങ്ങളെയും നിരാകരിക്കുന്ന നിലപാടാണ് സംസ്ഥാനത്തെ പല രാഷ്ട്രീയ പാർട്ടികളും സ്വീകരിച്ചിട്ടുള്ളത്.

ഞങ്ങളെ സംബന്ധിച്ചിടത്തോളം വികസിത കേരളം, സുരക്ഷിത കേരളം, വിശ്വാസ സംരക്ഷണം എന്നിവ വെറും മുദ്രാവാക്യങ്ങൾ മാത്രമല്ല; അത് ഞങ്ങളുടെ ദൗത്യം കൂടിയാണ്. കേരളത്തിനും മലയാളി സമൂഹത്തിനും നന്മ വരുത്തുന്ന എല്ലാ കാര്യങ്ങൾക്കും എന്നും എന്റെ പിന്തുണയുണ്ടാകും.