ഓഫീസ് സമയം: നിവേദനം നൽകി

കൊച്ചി: സർക്കാർ ഓഫീസുകളുടെ പ്രവൃത്തിദിവസം അഞ്ചായി കുറയ്‌ക്കാനുള്ള നീക്കം പുന:പരിശോധിക്കണമെന്ന് കൊച്ചിൻ ചേംബർ ഒഫ് കൊമേഴ്സ് ആൻഡ് ഇൻഡസ്ട്രി, ചീഫ് സെക്രട്ടറിക്ക് നൽകിയ നിവേദനത്തിൽ ആവശ്യപ്പെട്ടു. ജീവനക്കാരുടെ താത്പര്യങ്ങൾ പരിഗണനയും പ്രാധാന്യവും നൽകുമ്പോൾ പൊതുജനങ്ങളുടെയും വ്യവസായ വാണിജ്യ മേഖലയുടെ താല്പര്യങ്ങളും പരിഗണിക്കണം. ഓഫീസ് കാര്യങ്ങൾ, സാമ്പത്തിക, ഉത്പാദന, ബിസിനസ് മേഖലകൾക്ക് ദോഷകരമാകരുത്. വ്യവസായ വാണിജ്യ മേഖലകൾക്ക് ലഭിക്കേണ്ട അനുമതികൾ, അംഗീകാരങ്ങൾ തുടങ്ങിയവ വൈകുന്നത് പരിഗണിക്കണം. ആറു ദിവസം ഓഫീസുകൾ പ്രവർത്തിച്ചിട്ടും ഫയൽനീക്കം, വകുപ്പുകൾ തമ്മിലുള്ള ഏകോപനം എന്നിവ സുഗമമല്ല. സമയം കുറയ്‌ക്കുന്നത് സർക്കാർ സേവനങ്ങൾ വൈകാനോ മുടങ്ങാനോ കാരണമാകരുതെന്ന് ചേംബർ പ്രസിഡന്റ് വിനോദിനി സുകുമാരൻ പറഞ്ഞു.