ബ്ലെസിംഗ് സിംബാബ്‌വെ! ഓ'ശൂ"സ്

ട്വൻ്റി-20 ലോകകപ്പ് : ഓസ്ട്രേലിയയെ അട്ടിമറിച്ച് സിംബാബ്വെ

കൊളംബോ : ട്വന്റി- 20 ലോകകപ്പിൽ മുൻ ചാമ്പ്യന്മാരായ ഓസ്ട്രേലിയയെ ഒടിച്ച് മടക്കി പോക്കറ്റിലാക്കി സിംബാബ്‌വെ.

കൊളംബോയിലെ പ്രേമദാസ സ്റ്റേഡിയം വേദിയായ ഗ്രൂപ്പ് ബിയിലെ മത്സരത്തിൽ അനായാസ ജയം തേടിയിറങ്ങിയ ഓസീസിനെ 23 റൺസിന് തീർത്താണ് സിംബാബ്‌വെ ട്വന്റി- 20 ലോകകപ്പിന്റെ പത്താം എഡിഷനിലെ ആദ്യ അട്ടിമറി കുറിച്ചത്.

ആദ്യം ബാറ്ര് ചെയ്ത സിംബാബ്‌വെ 20 ഓവറിൽ 2 വിക്കറ്റ് നഷ്‌ടത്തിൽ 169 റൺസ് നേടി. മറുപടിക്കിറങ്ങിയ ഓസ്ട്രേലിയ 19.3 ഓവറിൽ 146 റൺസിന് ഓൾഔട്ടാക്കുകയായിരുന്നു.

ബ്ലെസിംഗാണ് മുസർബാനി

4 ഓവറിൽ 17 റൺസ് മാത്രം നൽ കി 4 വിക്കറ്റ് വീഴ്‌ത്തിയ പേസർ ബ്ലെസിംഗ് മുസറബനിയാണ് കരുത്തുറ്റ ഓസീസ് ബാറ്റിംഗ് നിരയുടെ നട്ടെല്ലൊടിച്ച് സിംബാബ്‌വെയ്‌ക്ക് ചരിത്ര ജയം സമ്മാനിച്ചത്. മുസറബനി തന്നെയാണ് കളിയിലെ താരം. 3 വിക്കറ്റ് വീഴ്‌ത്തിയ മറ്റൊരു പേസർ ബ്രാഡ് ഇവാൻസും സിംബാബ്‌വെയുടെ വിജയത്തിൽ നിർണായക പങ്കുവഹിച്ചു.

അർദ്ധ സെഞ്ച്വറി നേടിയ മാറ്റ് റെൻഷോയ്‌ക്കും (44 പന്തിൽ 65)​,​ ഗ്ലെൻ മാക്‌സ്‌വെല്ലിനും ( 31)​ മാത്രമാണ് ഓസീസ് ബാറ്റർമാരിൽ പിടിച്ചു നിൽക്കാനായുള്ളൂ. ഇവരെക്കൂടാതെ ട്രാവിസ് ഹെഡിന് (17)​ മാത്രമാണ് ഓസീസ് നിരയിൽ രണ്ടക്കം കടക്കാനായത്. വമ്പനടിക്ക് പേരുകേട്ട കാമറൂൺ ഗ്രിനും ടിം ഡോവിഡും ലാസ്റ്റ് മാൻ മാത്യു കുൻഹെമാനും ഡക്കായി. ഓസീസ് ഇന്നിംഗ്‌സിന്റെ രണ്ടാ ം ഓവറിൽ ബാളെറിയാനെത്തിയ മുസറബനി ആദ്യ പന്തിൽ തന്നെ ഓപ്പണർ ജോഷ് ഇംഗ്ലിസിനെ (8)​ മുസെകിവയുടെ കൈയിൽ എത്തിച്ചാണ് മുസറബാനി ഓസീസിന്റെ തകർച്ചയ്ക്ക് തുടക്കമിട്ടത്. മാർകസ് സ്റ്റോയിനിസ് (6)​,​ ഡാർഷ്യുസ് (6)​ എന്നിവരും നനഞ്ഞ പടക്കങ്ങളായി.

ബ്രില്ല്യന്റ് ബ്രിയാൻ

അർദ്ധ സെഞ്ച്വറിയുമായി പുറത്താകാതെ നിന്ന ഓപ്പണർ ബ്രിയാൻ ബെന്നെറ്രാണ് (64)​ സിംബാബ്‌വെയുടെ ടോപ് സ്കോറർ. മറുമനി (31 പന്തിൽ 35)​,​ റയാൻ (35)​,​ക്യാപ്ടൻ സിക്കന്ദർ റാസ (പുറത്താകാതെ 13 പന്തിൽ 25)​ എന്നിങ്ങനെ ബാറ്റിംഗിനിറങ്ങിയവരെല്ലാം തിളങ്ങി.

2-ട്വന്റി-20 ലോകകപ്പിൽ സിംബാബ്‌വെ ഓസ്ട്രേലിയയെ കീഴടക്കുന്നത് രണ്ടാം തവണ (ആദ്യ ജയം 2007ൽ)​

100-ബ്ലെസിംഗ് മുസറബനി അന്താരാഷ്ട്ര ട്വന്റി-20യിൽ 100 വിക്കറ്റ് തികച്ചു.

1- ഇത്തവണത്തെ ട്വന്റി-20 ലോകകപ്പിലെ ആദ്യ അട്ടിമറി. നേരത്തേ അഫ്‌ഗാൻ ദക്ഷിണാഫ്രിക്കയ്‌ക്ക് എതിരെയും നേപ്പാൾ ഇംഗ്ലണ്ടിനെതിരെയും അട്ടിമറിക്കടുത്തെത്തിയെങ്കിലും ഇടറി വീണു.

3-ഗ്രൂപ്പ് ബിയിൽ ഓസീസ് മൂന്നാം സ്ഥാനത്ത്. സിംബാബ്‌വെ രണ്ടാമതാണ്. ഒന്നാമത് ശ്രീലങ്ക.

കാനഡയെ വീഴ്ത്തി യു.എ.ഇ

ന്യൂഡൽഹി: ട്വന്റി-20 ലോകകപ്പിൽ ഗ്രൂപ്പ് ഡിയിലെ മത്സരത്തിൽ അഞ്ച് വിക്കറ്റിന് കാനഡയെ കീഴടക്കി സൂപ്പർ എട്ട് സ്വപ്‌നം കണ്ട് യു.എ.ഇ. സ്കോർ: കാനഡ 150/7 (20ഓവർ)​,​ യു.എ.ഇ 151/5 (19.4ഓവർ)​. ഇന്ത്യൻ വംശജൻ അയാൻഷ് ശർമ്മ (പുറത്താകാതെ 53 പന്തിൽ 74)​,​ഷൊയിബ് ഖാൻ (29 പന്തിൽ51) എന്നിവരാണ് ചേസിംഗിൽ യു.എ.ഇയുടെ മുന്നണിപ്പോരാളികളായത്.

ലോകകപ്പിൽ ഇന്ന്

അയർലൻഡ്- ഒമാൻ

(രാവിലെ 11 മുതൽ)

ഇംഗ്ലണ്ട് - സ്കോച്ച്‌ലാൻഡ്

(വൈകിട്ട് 3 മുതൽ)

ന്യൂസിലാൻഡ് - ദക്ഷിണാഫ്രിക്ക

(രാത്രി 7 മുതൽ)

ലൈവ്: സ്റ്റാർസ്പോർട്സ് ചാനലുകൾ , ജയി ഹോട്ട്‌സ്റ്റാർ.

യു.എസ്.എയ്‌ക്ക് ജയം

ചെന്നൈ: ട്വന്റി-20 ലോകകപ്പിൽ ഇന്നലെ നടന്ന ഗ്രൂപ്പ് എയിലെ മത്സരത്തിൽ യു.എസ്.എ 93 റൺസിന് നെതർലാൻഡ്‌സിനെ തോൽപ്പിച്ചു. സ്കോർ: യു.എസ്.എ 196/6 (20 ഓവർ)​,​ നെതർലാൻഡ്‌സ് 103/10 (15.5 ഓവർ)​.