ടാറ്റൂ അടിക്കുന്നവരെ കാത്ത് ഇങ്ങനെയൊരു ആരോഗ്യപ്രശ്നം, മുന്നറിയിപ്പുമായി വിദഗ്ദ്ധര്
പ്രായവ്യത്യാസമില്ലാതെ ടാറ്റൂ ചെയ്യുന്നത് ഇന്ന് വ്യാപകമായി മാറിയ ഒരു ഫാഷനാണ്. ശരീരത്തിന്റെ വിവിധ ഭാഗങ്ങളില് എത്രത്തോളം വ്യത്യസ്തമായി ടാറ്റൂ ചെയ്യാം എന്നാണ് യുവതലമുറ ആലോചിക്കുന്നത്. കൈകള്, കാലുകള്, നെഞ്ച്, വയറ് തുടങ്ങിയ ശരീരഭാഗങ്ങളിലാണ് നമ്മുടെ രാജ്യത്തുള്ളവര് കൂടുതലായും ടാറ്റു ചെയ്യുന്നത്. എന്നാല് പാശ്ചാത്യരെ മാതൃകയാക്കി അപകടകരമായ രീതിയില് ടാറ്റൂ ചെയ്യുന്ന പ്രവണതയും വര്ദ്ധിക്കുന്നുണ്ട്.
കണ്ണുകളില് പോലും ടാറ്റൂ ചെയ്യുന്നത് വര്ദ്ധിച്ചുവരുന്നതായാണ് പുതിയ കണ്ടെത്തല്. എന്നാല് ഇതിന് പിന്നില് വലിയ അപകടങ്ങള് ഒളിഞ്ഞിരിപ്പുണ്ടെന്നും കാലക്രമേണ കാഴ്ചയെ പോലും പ്രതികൂലമായി ബാധിക്കാന് സാദ്ധ്യതയുണ്ടെന്നുമാണ് ആരോഗ്യ വിദഗ്ദ്ധര് പറയുന്നത്. ചിലതരം കോസ്മെറ്റിക് ടാറ്റൂകള് അപകടകരമാണെന്നും വലിയ പ്രത്യാഘാതം സൃഷ്ടിക്കുമെന്നുമാണ് മുന്നറിയിപ്പ്. കണ്ണിനുള്ളിലെ വെളുത്ത ഭാഗത്ത് (ഐബോള്) ആണ് നാനോ സിറിഞ്ച് വഴി മഷി അഥവാ ഇങ്ക് നേരിട്ട് കുത്തിവച്ച് ടാറ്റൂ ചെയ്യുന്നത്. ഇത്തരം ടാറ്റൂകള് അടിക്കുന്നത് വഴി കാഴ്ചയെ ബാധിക്കാനാണ് സാദ്ധ്യത.
കണ്ണുകള് പോലെ സെന്സിറ്റീവായ ഭാഗങ്ങളില് ടാറ്റൂ ചെയ്യുന്നത് അണുബാധയുണ്ടാക്കും. എന്ഡോഫ്താല്മൈറ്റിസ്, കണ്ജക്റ്റിവിറ്റിസ് പോലുള്ള അണുബാധകള്ക്ക് ഇവ കാരണമാകും. ടാറ്റൂകളില് ഉപയോഗിക്കുന്ന മഷി റെറ്റിനയിലും വിട്രിയസിലും പ്രവേശിച്ച് കാഴ്ച പൂര്ണമായും നഷ്ടപ്പെടാനുള്ള സാധ്യതയുണ്ട്. കണ്ണിനുള്ളില് ടാറ്റൂകള് ചെയ്യുന്നത് വഴി കോര്ണിയല് എഡീമ (കണ്ണ് വീക്കം), ഗ്ലോക്കോമ, റെറ്റിന ഡിറ്റാച്ച്മെന്റ്, ഗ്രാനുലോമ, അലര്ജി തുടങ്ങിയ ഗുരുതരമായ നേത്ര പ്രശ്നങ്ങള് ഉണ്ടാക്കാനുള്ള സാദ്ധ്യത വളരെ കൂടുതലാണെന്നാണ് വിദഗ്ദ്ധര് പറയുന്നത്.
കണ്ണിനുള്ളില് ടാറ്റൂ ചെയ്യുന്ന പ്രക്രിയ പോലെ തന്നെ അപകടം നിറഞ്ഞതാണ് ഇവ നീക്കം ചെയ്യുന്നതും. വളരെ സങ്കീര്ണമായ ഒരു പ്രക്രിയയാണ് കണ്ണുകളിലെ ടാറ്റൂ നീക്കം ചെയ്യുന്നതും. ഒരു വിദഗ്ദ്ധ കണ്ണുരോഗ സ്പെഷ്യലിസ്റ്റിന് മാത്രമേ ഇത്തരമൊരു ശസ്ത്രക്രിയ വിജയകരമായി പൂര്ത്തിയാക്കാന് കഴിയുകയുള്ളൂ.