വേനലിനൊപ്പം പടർന്ന് ചിക്കൻപോക്സ്

കൊല്ലം: വേനൽ കടുത്തതോടെ ജില്ലയിൽ ചിക്കൻപോക്സ് രോഗികളുടെ എണ്ണത്തിൽ വൻ വർദ്ധന. ജാഗ്രതപാലിച്ചാൽ രോഗവ്യാപനം നിയന്ത്രിക്കാമെന്നാണ് ആരോഗ്യ വകുപ്പിന്റെ നിർദ്ദേശം. രോഗം സങ്കീർണ്ണമാകാതിരിക്കാൻ പ്രത്യേകം ശ്രദ്ധിക്കണമെന്നാണ് മുന്നറിയിപ്പ്. വെരിസെല്ല സോസ്​റ്റർ എന്ന വൈറസാണ് ഈ രോഗം പരത്തുന്നത്. വൈറസിന്റെ ഇൻക്യുബേഷൻ സമയം 10-21 ദിവസമാണ്. ശരീരത്തിൽ കുമിളകൾ പൊന്തിത്തുടങ്ങുന്നതിന് രണ്ട് ദിവസം മുമ്പുതൊട്ട് 58 ദിവസംവരെ അണുക്കൾ പകരാനുള്ള സാദ്ധ്യതയുണ്ട്. രോഗി തുമ്മുമ്പോഴും ചുമയ്ക്കുമ്പോഴുമാണ് രോഗാണുക്കൾ വായുവിലൂടെ പകരുന്നത്. 10 വയസിന് താഴെയുള്ള കുട്ടികളിലാണ് ഈ രോഗം അധികവും കാണപ്പെടുന്നത്. കുട്ടികളിൽ കാണപ്പെടുന്നത് സാധാരണ തരത്തിലായിരിക്കും. എന്നാൽ മുതിർന്നവരിൽ ഈ രോഗം കുട്ടികളിലും കൂടുതൽ സങ്കീർണ്ണമാകും. വേഗം പടർന്നുപിടിക്കുന്ന രോഗമായതിനാൽ ഒരാൾക്ക് വന്നാൽ കുടുംബത്തിലെ മറ്റുള്ളവർക്കും പകരാനുള്ള സാദ്ധ്യത കൂടുതലാണ്. മുൻകരുതലിനായി ചിക്കൻപോക്‌സ് ഉള്ളവരുമായി അടുത്ത് ഇടപഴകാതിരിക്കുക. 'അസൈക്ലോവിർ' ആണ് സാധാരണ ചിക്കൻ പോക്സിന് ഉപയോഗിക്കുന്ന ആന്റിവൈറസ് മരുന്ന്.

ഈ വർഷം റിപ്പോർട്ട് ചെയ്തത്..... 425 കേസുകൾ

ഈ മാസം 19 വരെ .......196 പേർ ചികിത്സ തേടി

പ്രധാന ലക്ഷണങ്ങൾ

പനി,ശരീരവേദന,ശരീരത്തിൽകുമിളകൾ പ്രത്യക്ഷപ്പെടും,കഠിനമായ ക്ഷീണം തുടങ്ങിയവയാണ് പ്രധാന ലക്ഷണങ്ങൾ. രോഗത്തിന്റെ ആരംഭത്തിൽ തലയുൾപ്പെടെയുള്ള ശരീരഭാഗങ്ങളിൽ ചെറിയ ചുവന്ന തടിപ്പുകൾ പ്രത്യക്ഷപ്പെടുന്നു മുഖം,നെഞ്ച്,തലയോട്ടി എന്നിവിടങ്ങളിലാണ് ആദ്യം കുരുക്കൾ പ്രത്യക്ഷപ്പെടുക.

കരുതാം

 രോഗലക്ഷണം കണ്ടാലുടൻ ചികിത്സ തേടുക

രോഗബാധിതർ വായുസഞ്ചാരമുള്ള മുറിയിൽ വിശ്രമിക്കുക

ധാരാളം വെള്ളവും പഴവർഗ്ഗങ്ങളും കഴിക്കുക വിശ്രമിക്കുക

 മറ്റുള്ളവരുമായി നേരിട്ടുള്ള സമ്പർക്കം ഒഴിവാക്കുക

രോഗിയുമായി ഇടപെടുമ്പോൾ മാസ്ക് ധരിക്കുക

 രോഗി ഉപയോഗിച്ച വസ്ത്രങ്ങളും മറ്റു വസ്തുക്കളും മറ്റുള്ളവരുമായി പങ്കിടാതെ ബ്ലീച്ചിംഗ് ലായനി ഒഴിച്ച് വൃത്തിയാക്കുക

രോഗം ബാധിച്ചവരുമായി അധികം ഇടപൊടതിരിക്കുക