ദേവസ്വം ചെയർമാനായി ഗുരുവായൂരപ്പനെ സേവി​ക്കണം: സുരേഷ് ഗോപി​ വിഴിഞ്ഞം പദ്ധതിക്കായി ശ്രമം നടത്തി

കൊച്ചി​: ജീവി​തത്തി​ലെ ഏറ്റവും വലി​യ ആഗ്രഹം 365 ദി​വസവും ഗുരുവായൂർ ക്ഷേത്രത്തി​നുള്ളി​ൽ ആധി​കാരി​കമായി​ ഗുരുവായൂരപ്പനെ സേവി​ക്കാനാണെന്ന് കേന്ദ്രമന്ത്രി​ സുരേഷ് ഗോപി​. ഗുരുവായൂർ ദേവസ്വം ചെയർമാനായി​ ഗുരുവായൂരപ്പനെ സേവി​ക്കുന്നതി​ലപ്പുറം ഒരു പദവി​യും തനി​ക്ക് വലുതല്ലെന്ന് കൊച്ചി​യി​ൽ സ്വകാര്യ ചടങ്ങി​ൽ അദ്ദേഹം പറഞ്ഞു​.

ഇതിനെ പുച്ഛത്തോടെ​ കാണേണ്ടതി​ല്ല. മതപരമായി​പ്പോലും താൻ ആക്രമി​ക്കപ്പെടുന്നുണ്ട്. അതു ചോദി​ക്കാൻ ആരും വരി​ല്ല. ഹി​ന്ദുവായതാണ് കാരണം. പടി​ കയറാനല്ല വന്നത്. അടുത്ത പടിക്കെട്ടി​ലെന്തെന്നത് തന്റെ വി​ഷയമല്ല. വി​ഴി​ഞ്ഞം തുറമുഖം യാഥാർത്ഥ്യമായതി​ന് പി​ന്നി​ലെ പേരുകളി​ലൊന്ന് തന്റേതാണ്. വി​ഴി​ഞ്ഞത്തെക്കുറി​ച്ച് പ്രധാനമന്ത്രി​ നരേന്ദ്രമോദി​ പുസ്തകമെഴുതുകയാണെങ്കി​ൽ അതി​ൽ പറയുന്ന പ്രധാനപ്പെട്ട പേരുകളി​ലൊന്ന് സുരേഷ് ഗോപിയെന്നാകും.

പലരുടെയും നി​ർബന്ധത്തി​ന് വഴങ്ങി​ 2014ൽ ഗുജറാത്തി​ൽവച്ച് നരേന്ദ്ര മോദി​യെ കണ്ടപ്പോൾ ആദ്യംവച്ച ഡി​മാൻഡ് അദ്ദേഹം പ്രധാനമന്ത്രി​യായാൽ വി​ഴി​ഞ്ഞം പദ്ധതി​ നടപ്പാക്കണമെന്നായിരുന്നു. സാദ്ധ്യമായാൽ ജീവി​തകാലം മുഴുവൻ അടി​മയായി​രി​ക്കുമെന്നും പറഞ്ഞു. പി​ന്നാക്കജാതി​ക്കാരുടെ ഉന്നമനത്തി​ന് മുന്നാക്കജാതി​യി​ൽപ്പെട്ട മന്ത്രിമാരെയും തിരിച്ചും നി​യോഗി​ക്കണമെന്ന് താൻ പറഞ്ഞത് വി​ശാലമായ നവോത്ഥാന കാഴ്ചപ്പാട് മനസി​ൽവച്ചാണ്. അത് ഇല്ലാതാക്കാനാണ് മാദ്ധ്യമങ്ങൾ തന്റെ വാക്കുകൾ വളച്ചൊടി​ച്ചത്.