അമിത വിലകൊടുത്ത് ഇനി ലെറ്റ്യൂസ് വാങ്ങേണ്ട; 30 ദിവസംകൊണ്ട് വീട്ടിൽ വളർത്തിയെടുക്കാം

മികച്ച പോഷകഗുണങ്ങളടങ്ങിയ ഇലവർഗങ്ങളിലൊന്നാണ് ലെ​റ്റ്യൂസ്. ഉർവച്ചീര,​ ലേറ്റുസ് തുടങ്ങിയ വിവിധ പേരുകളിലാണ് ലെറ്റ്യൂസ് അറിയപ്പെടുന്നത്. ശരീരഭാരം കുറയ്ക്കുന്നതിനും രോഗപ്രതിരോധശേഷി വർദ്ധിപ്പിക്കുന്നതിനും ലെ​റ്റ്യൂസ് കഴിക്കുന്നത് ഗുണം ചെയ്യും. പാകം ചെയ്യാതെ സലാഡുകളിൽ ഉൾപ്പെടുത്തിയും അല്ലാതെയും ലെ​റ്റ്യൂസ് ദിവസവും കഴിക്കുന്നവരേറെയാണ്. സൂപ്പർമാർക്ക​റ്റുകളിലാണ് കൂടുതലും ലെ​റ്റ്യൂസ് വിൽപ്പനയ്ക്ക് എത്തുന്നത്. ലെ​റ്റ്യൂസിന്റെ ഒരുഭാഗം വാങ്ങുന്നതിനുവരെ 50 രൂപയിലധികം നൽകേണ്ടതുണ്ട്. ഇക്കാരണം കൊണ്ട് ചിലരെങ്കിലും വാങ്ങുന്നത് കുറയ്ക്കാറുണ്ട്. എന്നാൽ അധിക പണചെലവില്ലാതെ വെറും ഒരുമാസം കൊണ്ട് നിങ്ങൾക്ക് ലെ​റ്റ്യൂസ് വീട്ടിൽ കൃഷി ചെയ്യാം.

കൃഷി ചെയ്യേണ്ട രീതി

വളരെ എളുപ്പത്തിൽ കൃഷി ചെയ്യാൻ സാധിക്കുന്ന ഒരിനമാണ് ലെ​റ്റ്യൂസ്. സാധാരണ ലെ​റ്റ്യൂസ് നമ്മുടെ കാലാവസ്ഥയ്ക്കനുസരിച്ച് കൃഷി ചെയ്യാൻ സാധിക്കുന്ന ഒരിനമല്ലെന്നാണ് പലരും പറയുന്നത്. ചില ഇനം ലെ​റ്റ്യൂസ് വളരാൻ നല്ല തണുപ്പ് വേണ്ടിവരും. എന്നാൽ മ​റ്റുചില ഇനം ലെ​റ്റ്യൂസിന് വളരാൻ അധികം തണുപ്പ് ആവശ്യമില്ല. അങ്ങനെയുള്ളവ നമുക്ക് വീട്ടിൽ കൃഷി ചെയ്യാം.

വിത്ത് തിരഞ്ഞെടുക്കുമ്പോൾ ആദ്യം അതാണ് ശ്രദ്ധിക്കേണ്ടത്. വിത്തുകളുപയോഗിച്ച് നമുക്ക് ലെ​റ്റ്യൂസ് തൈകൾ വളർത്തിയെടുക്കാം. ശേഷം തൈകൾ ഗ്രോ ബാഗുകളിലേക്കോ ചെറിയ ചട്ടികളിലോ മാ​റ്റാം. ഒരു ചട്ടിയിൽ മൂന്നോ നാലോ തൈകൾ വച്ചുനടാം. ഒരുപാട് തൈകൾ ഒരു ചട്ടിയിൽ വളർത്തരുത്. എങ്കിൽ മുരടിപ്പ് വരാൻ സാദ്ധ്യതയുണ്ട്. അധികം ശ്രദ്ധ കൊടുത്തില്ലെങ്കിലും ലെ​റ്റ്യൂസ് വളരും. നല്ലരീതിയിൽ സൂര്യപ്രകാശവും വെള്ളവും മാത്രം നൽകിയാൽ മതിയാകും. ഇത്തരത്തിൽ കൃത്യമായ രീതിയിൽ കൃഷി ചെയ്താൽ 30 മുതൽ 40 ദിവസത്തിനുള്ളിൽ വിളവെടുക്കാൻ സാധിക്കും. അതിനുശേഷം വിളവെടുത്താൽ ഇലയിൽ കയ്പുണ്ടാകും. ഓഗസ്​റ്റ് മുതൽ ജനുവരി വരെയാണ് കൃഷി ചെയ്യാൻ അനുകൂലമായ സമയം.