അബുദാബിയിലേക്ക് ഇന്ന് പ്രത്യേക കാർഗോ വിമാനം

നെടുമ്പാശേരി: കൊച്ചിയിൽ നിന്ന് അബുദാബിയിലേക്ക് ഇന്ന് പ്രത്യേക കാർഗോ വിമാനം സർവീസ് നടത്തും. നാഷണൽ എയർലൈൻസിന്റെ ബോയിംഗ് 747 വിമാനമാണ് ഉപയോഗിക്കുക. രാവിലെ 8ന് അബുദാബിയിൽ നിന്ന് ചരക്കില്ലാതെയാണ് വിമാനമെത്തുക. തുടർന്ന് 11ന് ചരക്കുകളുമായി പുറപ്പെടും. അങ്കമാലിയിലെ ഫെയർ എക്സ്പോർട്ട്സ് (ഇന്ത്യ) പ്രൈവറ്റ് ലിമിറ്റഡ് ക്രമീകരിച്ചിരിക്കുന്ന വിമാനത്തിൽ പഴം, പച്ചക്കറികളാണ് കൂടുതലായി കൊണ്ടുപോകുന്നത്.

ഗൾഫിലേക്ക് ഇന്നലെ പറന്നത് 10 വിമാനം

പശ്ചിമേഷ്യയിലെ സംഘർഷത്തെ തുടർന്ന് നിറുത്തിവച്ചിരുന്ന വിമാന സർവീസുകളിൽ പലതും പുന:രാരംഭിച്ചതോടെ ഗൾഫിലേക്കും തിരികെയുമുള്ള യാത്രക്കാരുടെ എണ്ണവും വർദ്ധിച്ചു. ഇന്നലെ 10 വിമാനങ്ങൾ കൊച്ചിയിൽ നിന്ന് ഗൾഫ് രാജ്യങ്ങളിലേക്ക് പുറപ്പെട്ടു.14 വിമാനങ്ങൾ കൊച്ചിയിലേക്കും സർവീസ് നടത്തി. 67 വിമാനങ്ങൾ റദ്ദാക്കി. ഇന്ന് കൂടുതൽ സർവീസുകൾ നടത്തുമെന്നാണ് വിമാനക്കമ്പനികൾ അറിയിച്ചിട്ടുള്ളത്.