​പട്ടുടയാട

യുദ്ധം,​ റീലിൽ കാണാൻ

നല്ല രസമാണ്.

പരുന്ത് മുട്ടയിട്ടുകൊണ്ട്

പറക്കുമ്പോലെ

വിമാനങ്ങൾ ബോംബു

വർഷിക്കുന്നതു കാണാൻ

എന്തു ചേലാണ്!

വല്ലാത്ത പുകച്ചുരുളുകൾ

പക്ഷേ, നഷ്ടമാണ്.

ഒരു ഭംഗിയുമില്ല,​ അവയ്ക്ക്-

ഡേറ്റ വെറുതേ പോകും.

ഇപ്പോൾ പുകച്ചുരുളുകൾ

മാഞ്ഞു! യ്യോ...

അക്കാണുന്ന തകർന്ന വീട്

എന്റേതാണല്ലോ.

മുറ്റത്തെ അയയിൽ അനാഥപ്പെട്ട

കുഞ്ഞുടുപ്പും പട്ടുപാവാടയും

എന്റെ കുഞ്ഞാവയുടേതല്ലേ?​

അതിൽ നിറയെ ചോരയുടെ

പുള്ളികളാണല്ലോ.

ദൈവമേ,​

കാഴ്ച മങ്ങുന്നുവല്ലോ; ഒന്നും

കാണാനാവുന്നില്ലല്ലോ...