വിവാഹ വാഗ്ദാനം നൽകി പീഡനം ; സുവിശേഷകൻ പിടിയിൽ 

പന്തളം: വിവാഹ വാഗ്ദാനം നൽകി യുവതിയെ പീഡിപ്പിക്കുകയും 16ലക്ഷം രൂപ തട്ടിയെടുക്കുകയും ചെയ്ത കേസിൽ സുവിശേഷകൻ പിടിയിൽ. തിരുവനന്തപുരം അഞ്ചുതെങ്ങ് രോഹിണി ഭവനത്തി​ൽ പാസ്റ്റർ സാം ഹാർട്ടറെയാണ് (37) ഇരിങ്ങാലക്കുടയിൽ നിന്ന് പന്തളം പൊലീസ് അറസ്റ്റുചെയ്തത്. വിദേശത്ത് നഴ്സായ യുവതിയാണ് പരാതി​ക്കാരി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പാസ്റ്റർ സാം ഹാർട്ടർ വലിയ സുവിശേഷ യോഗങ്ങൾ സംഘടിപ്പിച്ചിരുന്നു. സുവിശേഷ യോഗത്തിൽ പങ്കെടുക്കുന്നതിനിടെയാണ് യുവതിയുമായി അടുപ്പത്തിലായത്. വിവാഹിതനായ ഇയാൾക്ക് 11വയസുള്ള കുട്ടിയുണ്ട്. നിലവിൽ മറ്റൊരു യുവതിക്കൊപ്പമാണ് കഴിയുന്നത്. ഈ ബന്ധത്തി​ലും ഇയാൾക്ക് ഒരു കുട്ടിയുള്ളതായി പൊലീസ് പറയുന്നു.

സാം ഹാർട്ടന്റെ പേരിൽ പത്തനംതിട്ട, തിരുവല്ല പൊലീസ് സ്റ്റേഷനുകളിൽ സാമ്പത്തിക തട്ടിപ്പിനും കേസുകൾ നിലവിലുണ്ട്. പന്തളം സ്റ്റേഷൻ ഹൗസ് ഓഫീസർ ടി​.ഡി.പ്രജീഷ്, എസ്.ഐ രാജൻ.പി.കെ, എ.എസ്.ഐ ബി.ഷൈൻ, പൊലീസ് ഉദ്യോഗസ്ഥരായ എസ്.അൻവർഷ, രഞ്ജിത്ത്.ആർ,​ നിയാസ് എന്നിവരടങ്ങിയ പ്രത്യേക അന്വേഷണ സംഘമാണ് പ്രതിയെ പിടികൂടിയത്.