കേരളം 2026: പരിചിതമായ ഇരുമുന്നണി രാഷ്ട്രീയത്തിനപ്പുറം

ഏപ്രിൽ ഒൻപതിന് നടക്കുന്ന നിയമസഭാ തിരഞ്ഞെടുപ്പിലേക്ക് കേരളം കടക്കുമ്പോൾ രാഷ്ട്രീയചിത്രം ഏറെക്കുറെ പരിചിതമാണ്. 2.71 കോടി വോട്ടർമാരുള്ള സംസ്ഥാനത്ത് 85 ശതമാനം പോളിംഗ് ഉറപ്പാക്കാനാണ് തിരഞ്ഞെടുപ്പ് കമ്മീഷൻ ലക്ഷ്യമിടുന്നത്. ക്ഷേമപദ്ധതികളുടെ പിൻബലത്തിൽ ഭരണത്തുടർച്ചയ്ക്കായി എൽ ഡി എഫ് ശ്രമിക്കുമ്പോൾ, ഭരണവിരുദ്ധ വികാരത്തിലാണ് യു ഡി എഫിന്റെ പ്രതീക്ഷ. അതേസമയം, മികച്ച നേതൃത്വത്തിലും വികസനത്തിലും ഊന്നൽ നൽകി എൻ ഡി എ തങ്ങളുടെ സാന്നിധ്യം ശക്തമാക്കുന്നു.

എന്നാൽ ഈ പതിവ് മത്സരങ്ങൾക്കപ്പുറം വലിയൊരു ചോദ്യം അവശേഷിക്കുന്നുണ്ട്; കേരളത്തിന്റെ കാലാകാലങ്ങളായുള്ള ഇരുമുന്നണി രാഷ്ട്രീയം സംസ്ഥാനത്തിന്റെ സാമ്പത്തിക ആവശ്യങ്ങൾ നിറവേറ്റുന്നതിൽ പരാജയപ്പെട്ടോ? പതിറ്റാണ്ടുകളായി മാറിമാറി ഭരിച്ച മുന്നണികൾ വിദ്യാഭ്യാസ, ആരോഗ്യ, സാമൂഹിക മേഖലകളിൽ മികച്ച നേട്ടങ്ങൾ കൈവരിച്ചിട്ടുണ്ട്. 95 ശതമാനത്തിലധികമുള്ള സാക്ഷരതാ നിരക്കും മികച്ച മാനവശേഷി വികസനവും ഇതിന് ഉദാഹരണമാണ്. എന്നാൽ സാമ്പത്തിക യാഥാർത്ഥ്യങ്ങൾ കൂടുതൽ സങ്കീർണ്ണമാണ്. വിദ്യാഭ്യാസവും തൊഴിലവസരങ്ങളും തമ്മിലും, മാനവശേഷിയും പ്രാദേശിക തൊഴിൽലഭ്യതയും തമ്മിലുമുള്ള വലിയ അന്തരമാണ് കേരളം നേരിടുന്ന പ്രധാന വെല്ലുവിളി. യുവജനങ്ങളിലെ തൊഴിലില്ലായ്മയാണ് ഇതിൽ ഏറ്റവും പ്രധാനം.

2023 ജൂലായ് മുതൽ 2024 ജൂൺ വരെയുള്ള പീരിയോഡിക് ലേബർ ഫോഴ്‌സ് സർവേ (PLFS) പ്രകാരം, 15-29 പ്രായക്കാരിൽ കേരളത്തിലെ തൊഴിലില്ലായ്മാ നിരക്ക് 29.9 ശതമാനമാണ്. ഇത് ദേശീയ ശരാശരിയായ 10 ശതമാനത്തിന്റെ മൂന്നിരട്ടിയോളമാണ്. ലിംഗാടിസ്ഥാനത്തിൽ നോക്കുമ്പോൾ ഈ അന്തരം കൂടുതൽ വ്യക്തമാകും: യുവാക്കളിൽ ഇത് 19.3 ശതമാനമാണെങ്കിൽ യുവതികളിൽ 47.1 ശതമാനമാണ്. ഗ്രാമീണ മേഖലയിലാകട്ടെ യുവജനങ്ങളിലെ തൊഴിലില്ലായ്മ 35.1 ശതമാനത്തിലെത്തി നിൽക്കുന്നു. ഇതൊരു ചെറിയ വ്യതിയാനമല്ല, മറിച്ച് ഉയർന്ന വിദ്യാഭ്യാസം നേടിയവരെ ഉൾക്കൊള്ളാൻ കഴിയാത്ത വ്യവസ്ഥിതിയുടെ പരാജയമാണ്.

പഠനത്തിലോ തൊഴിലിലോ പരിശീലനത്തിലോ അല്ലാത്തവരുടെ (NEET) നിരക്ക് 26 ശതമാനമാണെന്നത് ഈ പ്രതിസന്ധിയുടെ ആഴം കൂട്ടുന്നു. യുവതികളിൽ ഇത് 38 ശതമാനത്തിന് മുകളിലാണ്. ചുരുക്കത്തിൽ, മികച്ച നൈപുണ്യമുള്ള വലിയൊരു യുവസമൂഹത്തെ കേരളം സൃഷ്ടിക്കുന്നുണ്ടെങ്കിലും അവർക്ക് സ്വന്തം നാട്ടിൽ സാമ്പത്തിക പുരോഗതിക്കുള്ള വഴികളില്ല. ഇത് കേവലം തൊഴിലില്ലായ്മ മാത്രമല്ല, ഒരു തലമുറയുടെ സ്വപ്നങ്ങളുടെ തകർച്ച കൂടിയാണ്. കാലങ്ങളായി കേരളത്തിന്റെ സമ്പദ്‌വ്യവസ്ഥയെ താങ്ങിനിർത്തുന്നത് പ്രവാസികളാണ്. 2023-ലെ കേരള മൈഗ്രേഷൻ സർവേ പ്രകാരം 25 ലക്ഷത്തിലധികം മലയാളികൾ വിദേശത്ത് ജോലി ചെയ്യുന്നുണ്ട്. സംസ്ഥാനത്തിന്റെ വരുമാനത്തിന്റെ 20 ശതമാനത്തോളം വരുന്നത് ഈ പ്രവാസിപ്പണത്തിൽ നിന്നാണ്.

എന്നാൽ അടുത്ത കാലത്തായി ഈ കുടിയേറ്റത്തിന്റെ സ്വഭാവം മാറി. യുകെ, കാനഡ, ഓസ്ട്രേലിയ തുടങ്ങിയ രാജ്യങ്ങളിലേക്കുള്ള വിദ്യാർത്ഥികളുടെ ഒഴുക്ക് വെറുമൊരു തൊഴിൽ കുടിയേറ്റമല്ല, മറിച്ച് എന്നെന്നേക്കുമായി നാടുവിടാനുള്ള ആഗ്രഹമാണ് (aspirational exit). ഉപഭോഗത്തെ നിലനിർത്താൻ പ്രവാസിപ്പണത്തിന് കഴിയുമെങ്കിലും, ഇത് ഭാവിയിൽ പ്രതിഭകളുടെ ചോർച്ചയ്ക്കും (brain drain) പ്രായമായവരുടെ എണ്ണം വർദ്ധിക്കുന്നതിനും പ്രാദേശിക തൊഴിൽശേഷി കുറയുന്നതിനും കാരണമാകും. മറുവശത്ത് സാമ്പത്തിക പരിമിതികൾ സംസ്ഥാന സർക്കാരിന്റെ പ്രവർത്തനങ്ങളെ ബാധിക്കുന്നുണ്ട്. സംസ്ഥാനത്തിന്റെ ആഭ്യന്തര ഉൽപ്പാദനവും കടവും തമ്മിലുള്ള അനുപാതം (Debt-to-GSDP ratio) 30 ശതമാനത്തിന് മുകളിലാണ്. സർക്കാർ ചെലവുകൾ വർദ്ധിക്കുന്നതിനാൽ റവന്യൂ കമ്മി തുടരുകയാണ്.

സമ്പദ്‌വ്യവസ്ഥയിൽ ഉൽപ്പാദന മേഖലയുടെ സംഭാവന വളരെ കുറവാണ്. വൻകിട വ്യവസായങ്ങളുടെ വളർച്ചയും ഒട്ടും ആശാവഹമല്ല. നിക്ഷേപ-ഉൽപ്പാദന അധിഷ്ഠിതമായ ഒരു വ്യവസ്ഥയ്ക്ക് പകരം, ഉപഭോഗത്തിലും പ്രവാസിപ്പണത്തിലും ആശ്രയിക്കുന്ന ഒരു സാമ്പത്തിക മാതൃകയാണ് കേരളത്തിന്റേത്. ഭരണനിർവ്വഹണത്തിലെ ഏകോപനമില്ലായ്മയാണ് അധികം ചർച്ച ചെയ്യപ്പെടാത്ത മറ്റൊരു വിഷയം. ഭവന നിർമ്മാണം, കുടിവെള്ള വിതരണം, ആരോഗ്യ ഇൻഷുറൻസ് തുടങ്ങിയ കേന്ദ്രാവിഷ്കൃത പദ്ധതികൾ നടപ്പിലാക്കുന്നതിൽ സംസ്ഥാനത്ത് വലിയ വീഴ്ചകളുണ്ടെന്ന് ഔദ്യോഗിക പഠനങ്ങൾ വ്യക്തമാക്കുന്നു. കേന്ദ്ര-സംസ്ഥാന സർക്കാരുകൾ തമ്മിൽ മികച്ച ഏകോപനമുള്ള സംസ്ഥാനങ്ങളിൽ പദ്ധതി നിർവ്വഹണം വേഗത്തിലാണെന്നും ഫണ്ടുകൾ കൃത്യമായി വിനിയോഗിക്കപ്പെടുന്നുണ്ടെന്നും നീതി ആയോഗിന്റെയും റിസർവ് ബാങ്കിന്റെയും കണക്കുകൾ സൂചിപ്പിക്കുന്നു.

ഇതൊരു പ്രത്യയശാസ്ത്രപരമായ തർക്കമല്ല, ഭരണപരമായ കാര്യക്ഷമതയുടെ പ്രശ്നമാണ്. ഈ സാഹചര്യത്തിലാണ് എൻ ഡി എ മുന്നോട്ടുവയ്ക്കുന്ന "ഡബിൾ എഞ്ചിൻ സർക്കാർ" എന്ന ആശയത്തിന് പ്രസക്തിയേറുന്നത്. കേന്ദ്ര നയങ്ങളും സംസ്ഥാനത്തെ നിർവ്വഹണവും തമ്മിൽ യോജിപ്പുണ്ടായാൽ തടസ്സങ്ങൾ നീക്കാനും പദ്ധതികൾ വേഗത്തിൽ ജനങ്ങളിലെത്തിക്കാനും കഴിയും എന്നതാണീ ആശയം. ഇതിനോട് വിയോജിപ്പുള്ളവർക്ക് പോലും, സർക്കാരുകൾ തമ്മിലുള്ള ഏകോപനം വികസനത്തിന് അനിവാര്യമാണെന്ന യാഥാർത്ഥ്യം തള്ളിക്കളയാനാകില്ല.

രാജീവ് ചന്ദ്രശേഖറിന്റെ നേതൃത്വത്തിലുള്ള എൻ ഡി എയുടെ കേരളത്തിലെ പ്രചാരണം പരമ്പരാഗത രാഷ്ട്രീയ ശൈലികളിൽ നിന്നുള്ള ഒരു മാറ്റമാണ്. സാങ്കേതികവിദ്യയിലും സംരംഭകത്വത്തിലുമുള്ള അദ്ദേഹത്തിന്റെ പശ്ചാത്തലവും കേന്ദ്രമന്ത്രിയെന്ന നിലയിലുള്ള അനുഭവപരിചയവും തൊഴിലവസരങ്ങൾ സൃഷ്ടിക്കുന്നതിലും ഡിജിറ്റൽ സമ്പദ്‌വ്യവസ്ഥയിലും അടിസ്ഥാന സൗകര്യ വികസനത്തിലും ഊന്നൽ നൽകുന്നു. യുവാക്കൾക്ക് പ്രാതിനിധ്യം നൽകിയും പുതിയ ഭരണമാതൃകകൾ ചർച്ചയാക്കിയും, പതിവ് ശൈലിയിൽ നിന്ന് മാറി ഭരണനൈപുണ്യത്തിലേക്ക് രാഷ്ട്രീയ ചർച്ചകളെ മാറ്റാനാണ് എൻ ഡി എ ശ്രമിക്കുന്നത്.

ഇതൊന്നും തിരഞ്ഞെടുപ്പ് വിജയത്തിനുള്ള ഉറപ്പോ, എൽ ഡി എഫ് - യു ഡി എഫ് സർക്കാരുകൾ കൊണ്ടുവന്ന ക്ഷേമപദ്ധതികളുടെ പ്രസക്തി ഇല്ലാതാക്കലോ അല്ല. എന്നാൽ, ഉയർന്ന വിദ്യാഭ്യാസമുള്ളവരിലെ തൊഴിലില്ലായ്മയും വ്യവസായവൽക്കരണത്തിന്റെ അഭാവവും വലിയൊരു ചോദ്യമുയർത്തുന്നു: സമ്പത്ത് സൃഷ്ടിക്കുന്നതിന് പകരം, അത് വിതരണം ചെയ്യുന്നതിന് മാത്രമായിരുന്നോ ഇതുവരെയുള്ള ഭരണകൂടങ്ങൾ മുൻഗണന നൽകിയത്? ഈ തിരഞ്ഞെടുപ്പിലെ നിർണ്ണായക ശക്തി യുവവോട്ടർമാരായിരിക്കും. 4.2 ലക്ഷം കന്നി വോട്ടർമാരും, ആകെ വോട്ടർമാരിൽ 18 ശതമാനത്തിലധികം വരുന്ന 18-29 പ്രായക്കാരും പരമ്പരാഗത രാഷ്ട്രീയത്തിനപ്പുറം തൊഴിലവസരങ്ങൾക്കും സാമ്പത്തിക വളർച്ചയ്ക്കുമാണ് മുൻഗണന നൽകുന്നത്.

പഴയകാല രാഷ്ട്രീയ കഥകളേക്കാൾ, തങ്ങളുടെ ഭാവി എവിടെയാണെന്നതിലാണ് ഈ തലമുറയ്ക്ക് താല്പര്യം. കേരളം ഇന്ന് വലിയൊരു വഴിത്തിരിവിലാണ്. സാമൂഹിക പുരോഗതിയായിരുന്നു ഇതുവരെയുള്ള നേട്ടമെങ്കിൽ, സാമ്പത്തിക പരിവർത്തനമാണ് ഇനിയുള്ള ലക്ഷ്യം. സംസ്ഥാനത്തെ മാനവവിഭവശേഷിയെ എങ്ങനെ സ്വന്തം നാട്ടിൽ തന്നെ സുസ്ഥിരമായ അവസരങ്ങളാക്കി മാറ്റാം എന്നതാണ് വോട്ടർമാർക്ക് മുന്നിലുള്ള ചോദ്യം. നിലവിലെ ഇരുമുന്നണി സംവിധാനം സംസ്ഥാനത്ത് രാഷ്ട്രീയ സ്ഥിരത നൽകിയിട്ടുണ്ടെങ്കിലും, പുതിയ സാമ്പത്തിക വെല്ലുവിളികൾ നേരിടുന്നതിൽ അത് പരാജയപ്പെട്ടിരിക്കുന്നു. എൻ.ഡി.എയുടെ ഏകോപനാധിഷ്ഠിത വികസനമായാലും, നിലവിലെ മുന്നണികളുടെ തിരുത്തൽ നടപടികളായാലും ഇന്നത്തെ ആവശ്യം വ്യക്തമാണ്: ക്ഷേമപദ്ധതികളിൽ മാത്രം ഒതുങ്ങിനിൽക്കാതെ തൊഴിലവസരങ്ങൾ സൃഷ്ടിക്കുന്നതിലേക്കുള്ള ഒരു മാറ്റം.അതുകൊണ്ട് തന്നെ ഈ തിരഞ്ഞെടുപ്പ് കേവലം അധികാരത്തിന് വേണ്ടിയുള്ളതല്ല, മറിച്ച് കേരളത്തിന്റെ ഭാവി ദിശ നിർണ്ണയിക്കുന്നതിനുള്ളതാണ്.

CA. M R Ranjit Karthikeyan

BCom, LLM, DISA (ICAI),

FCA Founding Partner,

Ranjit Karthikeyan Associates LLP Thiruvananthapuram | Kochi | Kozhikode | Bengaluru

www.rkaglobal.com | +91 989 599 7000 | 949 727 0000