അഞ്ചാംതവണയും വിഷുക്കൈനീട്ടം മുടക്കാതെ ഡോ.കെ. ശിവപ്രസാദ്

കളമശേരി: കേരള ടെക്‌നിക്കൽ യൂണിവേഴ്സിറ്റി മുൻ വൈസ് ചാൻസലറും കുസാറ്റ് ഷിപ് ടെക്നോളജി വിഭാഗം പ്രൊഫസറുമായ ഡോ.കെ. ശിവപ്രസാദ് കുട്ടികൾക്ക് തപാൽ മുഖേന വിഷുക്കൈനീട്ടം നൽകുന്ന പതിവ് തെറ്റിച്ചില്ല. ഇടപ്പള്ളിയിലെ ഓഫീസ് വഴി 40 കുട്ടികൾക്കുള്ള കൈനീട്ടത്തുക അദ്ദേഹം കൈമാറി. പോസ്റ്റ് ഓഫീസ് മേധാവി ആശാ ദാമോദരൻ തുക ഏറ്റുവാങ്ങി.

അംഗപരിമിതർക്കായി പ്രവർത്തിക്കുന്ന സക്ഷമ സംഘടനയുടെ ജില്ലാ കേന്ദ്രങ്ങളിലെ 40 കുട്ടികൾക്കാണ് ഡോ.കെ. ശിവപ്രസാദ് കൈനീട്ടം നൽകിയത്. തപാൽവകുപ്പ് 2022ൽ പദ്ധതി ആരംഭിച്ചത് മുതൽ അദ്ദേഹം മുടങ്ങാതെ പങ്കാളിയാണ്. 100, 200, 500, 1000 രൂപ വീതമാണ് കൈനീട്ടമായി അയക്കാനാവുക. തപാൽവകുപ്പിന്റെ വകയായി ഒരുരൂപകൂടി ഇതിനൊപ്പം നൽകും.

തുകയ്ക്കനുസരിച്ച് 19, 29, 39, 49 രൂപയും 18 % ജി.എസ്.ടിയുമാണ് കമ്മിഷൻ. വിഷുദിവസം പ്രത്യേക കവറിൽ തുക മേൽവിലാസക്കാരന് ലഭിക്കും. കേരളത്തിലെ പോസ്റ്റ് ഓഫീസുകളിൽ മാത്രമുള്ള ഈ സൗകര്യംവഴി മറ്റ് സംസ്ഥാനങ്ങളിൽനിന്ന് ഇങ്ങോട്ടും അയക്കാം. അയക്കുന്നവരുടെയും സ്വീകർത്താക്കളുടെയും വിലാസവും ഫോൺനമ്പറും സഹിതം 9നകം അപേക്ഷിക്കണം.