നിതിൻരാജിന്റെ മരണം: ഇൻസ്റ്റ പേ ലോൺ ആപ്പിനെതിരെ കേസ്

കണ്ണൂർ: അഞ്ചരക്കണ്ടി സ്വാശ്രയ ഡെന്റൽ കോളേജിലെ ഒന്നാംവർഷ ബി.ഡി.എസ് വിദ്യാർത്ഥി ആർ.എൽ.നിതിൻ രാജിന്റെ മരണത്തിൽ ഇൻസ്റ്റ പേ ലോൺ ആപ്പിനെതിരെ ചക്കരയ്ക്കൽ പൊലീസ് സ്വമേധയാ കേസെടുത്തു. ലോൺ ആപ്പ് ഏജന്റുമാർ നിതിനെ നിരന്തരം ഭീഷണിപ്പെടുത്തുകയും മാനസികമായി പ്രതിസന്ധിയിലാക്കുകയും ചെയ്തെന്ന് എഫ്.ഐ.ആറിൽ പറയുന്നു. കഴിഞ്ഞ ജനുവരിയിലാണ് 36 ശതമാനം പലിശ നിരക്കിൽ നിതിൻരാജ് 15,000 രൂപ വായ്പയെടുത്തത്. തുക തിരിച്ചടക്കാൻ സമ്മർദ്ദം ചെലുത്തി ലോൺ ആപ്പ് ഏജന്റുമാർ അദ്ധ്യാപകരുൾപ്പെടെ നിരവധി പേരുടെ ഫോണുകളിലേക്ക് ഭീഷണി സന്ദേശങ്ങൾ അയക്കുകയായിരുന്നു. തുടർന്ന് കോളേജ് പ്രിൻസിപ്പൽ നിതിനെ വിളിച്ചുവരുത്തി ചോദ്യം ചെയ്തതായും വ്യക്തമായിട്ടുണ്ട്. ഈ സംഭവവികാസങ്ങൾ വിദ്യാർത്ഥിയെ ആത്മഹത്യയിലേക്ക് നയിച്ചെന്നാണ് പൊലീസിന്റെ കണ്ടെത്തൽ. ലോൺ ആപ്പ് ഭീഷണിയുമായി ബന്ധപ്പെട്ട് നേരത്തെ സൈബർ സെൽ ഏർപ്പെടുത്തിയ കേസിന്റെ വിവരങ്ങൾ ചക്കരയ്ക്കൽ പൊലീസിന് കൈമാറിയിരുന്നു. തുടർന്നാണ് ചക്കരക്കൽ പൊലീസ് സ്വമേധയാ കേസ് ഫയൽ ചെയ്തത്.