ആയി​ല്യപുണ്യത്തി​ൽ തിരുവൈരാണിക്കുളം

കാലടി: തിരുവൈരാണിക്കുളം മഹാദേവ ക്ഷേത്രത്തിൽ ശ്രീപാർവ്വതീദേവിയുടെ നടതുറപ്പ് മഹോത്സവത്തിനെത്തിയ ഭക്തർക്ക് തിങ്കൾ മഹാത്മ്യവും ആയില്യവും ഒത്തുചേർന്ന പുണ്യ ദിനമായി ഇന്നലെ.

ക്ഷേത്രം മേൽശാന്തി നടുവം നാരായണൻ നമ്പൂതിരിയുടെ കാർമികത്വത്തിലായി​രുന്നു ആയില്യം പൂജകൾ. മഞ്ഞൾപ്പൊടിയിൽ ആറാടി നിൽക്കുന്ന നാഗദേവതാ പ്രതിഷ്ഠകൾക്കു മുന്നിൽ നൂറും പാലും വച്ചു നടന്ന വിശേഷാൽ പൂജകളിൽ ആയി​രങ്ങൾ പങ്കെടുത്തു.

ഇരുപതോളം പുള്ളുവ കുടുംബാംഗങ്ങളാണ് നാഗപ്രീതിക്കു വേണ്ടി സർപ്പം പാട്ടുകൾ പാടി ഭക്തരുടെ ദുഃഖങ്ങളകറ്റാൻ ക്ഷേത്രത്തി​ൽ എത്തിയിട്ടുള്ളത്. പാരമ്പര്യമായി വാമൊഴിയായി പകർന്നു കിട്ടിയ ഈ പാട്ടുകളിൽ നാഗ ദേവതകളായ അനന്തൻ, വാസുകി, തക്ഷകൻ, ഗുളികൻ, കാർക്കോടകൻ എന്നിവരെയാണ് സ്തുതിക്കുന്നത്.

വൈക്കം, ചേർത്തല, കോതമംഗലം, ഏറ്റുമാന്നൂർ പ്രദേശത്തു നിന്നുള്ളവരാണ് വർഷങ്ങളായി തിരുവൈരാണിക്കുളം ക്ഷേത്രത്തിലെ നടതുറപ്പ് മഹോത്സവ നാളുകളിൽ പുള്ളുവൻ പാട്ടിന്റെ സ്വരമാധുരി തീർക്കുന്നത്.