24 മണിക്കൂറിനുള്ളിൽ കാർഡ് റെഡി; പക്ഷേ കിറ്റില്ല

തിരുവനന്തപുരം: കൊവിഡ് കാലത്ത് 24 മണിക്കൂറിനുള്ളിൽ റേഷൻ കാർഡ് കിട്ടുമെന്നറിഞ്ഞ് പതിനായിരത്തോളം പേർ അപേക്ഷിച്ച് കാർഡ് സ്വന്തമാക്കിയെങ്കിലും ആർക്കും സൗജന്യക്കിറ്റ് ലഭിക്കില്ലെന്ന് ഭക്ഷ്യവകുപ്പ് പറയുന്നു.

അതേസമയം ഈ മാസത്തെ റേഷൻ വിഹിതം അടുത്ത ആഴ്ച നൽകുമെന്നാണ് അറിയുന്നത്. അപേക്ഷിച്ച ഭൂരിഭാഗം പേർക്കും കിട്ടിയത് മുൻഗണനേതര (വെള്ള)​ കാർഡാണ്. അതിൽ ചിലരുടെ അപേക്ഷ സ്വീകരിച്ച് മുൻഗണന കാർഡാക്കി (പിങ്ക്,​മഞ്ഞ)​ മാറ്റിയിരുന്നു.

 മനസുവച്ചാൽ കിറ്റ് നൽകാം

മുപ്പത്തിയേഴായിരം പേർ കിറ്റ് വേണ്ടെന്ന് സർക്കാരിനെ അറിയിച്ചിട്ടുണ്ട്. ഇതിന് പുറമെ മഞ്ഞകാർഡുകാർ വാങ്ങാത്ത 8000,​ പിങ്ക് കാർഡുകാർ വാങ്ങാത്ത 53,​000,​ നീല കാർഡുകാർ വാങ്ങാത്ത ഒരുലക്ഷം കിറ്റുകളും ബാക്കിയുണ്ട്. ഈ കിറ്റുകൾ പുതിയ കാർഡുകാർക്ക് നൽകാവുന്നതേയുള്ളൂ.