പദ്മരാജൻ പുരസ്കാരം: മികച്ച നോവൽ സമുദ്രശില, സംവിധായകൻ മധു സി.നാരായണൻ

തിരുവനന്തപുരം: പദ്മരാജൻ മെമ്മോറിയൽ ട്രസ്റ്റിന്റെ സാഹിത്യ,​ ചലച്ചിത്ര പുരസ്കാരങ്ങൾ പ്രഖ്യാപിച്ചു. മികച്ച നോവലിനുള്ള ആദ്യ പുരസ്കാരത്തിന് സുഭാഷ് ചന്ദ്രന്റെ 'സമുദ്രശില' അർഹമായി. 20,000 രൂപയും പ്രശസ്തിപത്രവുമാണ് പുരസ്കാരം. മികച്ച ചെറുകഥയായി (15,​000 രൂപ)​ സാറാ ജോസഫിന്റെ 'നീ' തിരഞ്ഞെടുത്തു. 'കുമ്പളങ്ങി നൈറ്റ്സ്' ഒരുക്കിയ മധു സി. നാരായണൻ മികച്ച സംവിധായകനായി (25,​000 രൂപ)​. സജിൻബാബുവാണ് മികച്ച തിരക്കഥാകൃത്ത് (15,000 രൂപ)​ ചിത്രം : ബിരിയാണി. 'ഉയരെ'യുടെ തിരക്കഥയ്ക്ക് ബോബി,​ സഞ്ജയ് പ്രത്യേക ജൂറി പരാമർശം ലഭിച്ചു.

പ്രസന്നരാജൻ,​ ശ്യാമപ്രസാദ് എന്നിവർ ചെയർമാൻമാരായ ജൂറിയാണ് നിർണയം നടത്തിയത്. പുരസ്കാരദാനചടങ്ങ് പിന്നാലെ അറിയിക്കുമെന്ന് ട്രസ്റ്റ് ചെയർമാൻ വിജയകൃഷ്ണൻ,​ ജനറൽ സെക്രട്ടറി ബൈജു ചന്ദ്രൻ,​ സെക്രട്ടറി പ്രദീപ് പനങ്ങാട് എന്നിവർ അറിയിച്ചു.