ട്രാക്‌ടർ വില്പനയിൽ വൻ കുതിപ്പ്

ന്യൂഡൽഹി: ഇന്ത്യൻ സമ്പദ്‌വ്യവസ്ഥയുടെ നട്ടെല്ലായ ഗ്രാമീണ,​ കാർഷിക മേഖല ഉണർവിലേക്ക് കരകയറുന്നുവെന്ന് വ്യക്തമാക്കി ജൂണിൽ ട്രാക്‌ടർ വില്പന മേയ് മാസത്തെ അപേക്ഷിച്ച് 52 ശതമാനം ഉയർന്നു. കഴിഞ്ഞവർഷം ജൂണിനെ അപേക്ഷിച്ച് വില്പന വർദ്ധന 20 ശതമാനമാണ്.

മികച്ച മൺസൂണിന്റെ ബലത്തിൽ ഖാരിഫ്,​ റാബി കൃഷിയിൽ ഉയർന്ന വിളവുണ്ടായതാണ് ട്രാക്‌ടർ വിപണിക്ക് നേട്ടമായത്. ട്രാക്‌ടറുടെ നിർമ്മാണം കഴിഞ്ഞ 20 മാസത്തെ ഉയരവും ജൂണിൽ കുറിച്ചു. ആഭ്യന്തര വിപണിയിൽ മാത്രം 54 ശതമാനം വർദ്ധനയോടെ കഴിഞ്ഞമാസം 92,​888 ട്രാക്‌ടറുകൾ വിറ്റഴിഞ്ഞു. മേയിൽ വില്പന 60,​441 യൂണിറ്റുകളായിരുന്നു.

5,​760 യൂണിറ്റുകളുടെ കയറ്റുമതി ഉൾപ്പെടെ കഴിഞ്ഞമാസത്തെ മൊത്തം വില്പന 98,​648 എണ്ണമാണ്; വർദ്ധന 52 ശതമാനം. 2019 ജൂണിലെ വില്പന 82,​064 യൂണിറ്റുകളായിരുന്നു; കയറ്റുമതി ചെയ്‌തത് 6,​205 യൂണിറ്റുകളും.