കൊവിഡിൽ കിതച്ച് കശുഅണ്ടി കയറ്റുമതി

കൊച്ചി: കൊവിഡിന്റെ പശ്‌ചാത്തലത്തിൽ ഇന്ത്യയിൽ നിന്നുള്ള കശുഅണ്ടി കയറ്രുമതി നേരിടുന്നത് കനത്ത നഷ്‌ടം. നടപ്പു സാമ്പത്തിക വർഷത്തെ (2020-21)​ ആദ്യപാദത്തിൽ (ഏപ്രിൽ-ജൂൺ)​ കയറ്റുമതി അളവ് 41 ശതമാനവും കയറ്രുമതി മൂല്യം 38 ശതമാനവും ഇടിഞ്ഞു. കൊവിഡ് ഭീതിയും ലോക്ക്ഡൗണും മൂലം ഒട്ടേറെ ഫാക്‌ടറികൾ പൂട്ടിയതും ആഭ്യന്തര-വിദേശ വിതരണം കുത്തനെ കുറഞ്ഞതുമാണ് തിരിച്ചടിയായത്.

അതേസമയം,​ ഏപ്രിലിനെ അപേക്ഷിച്ച് അമേരിക്ക,​ യൂറോപ്യൻ യൂണിയൻ,​ ജപ്പാൻ,​ ഓസ്‌ട്രേലിയ,​ ഇറാൻ എന്നിവിടങ്ങളിൽ മേയിലും ജൂണിലും റീട്ടെയിൽ വില്പന മെച്ചപ്പെട്ടത് കശുഅണ്ടി കയറ്റുമതി മേഖലയ്ക്ക് പുതിയ പ്രതീക്ഷകൾ നൽകുന്നുണ്ട്. ആഭ്യന്തരതലത്തിലെ പ്രമുഖ വിപണികളായ ഡൽഹി,​ ജയ്‌പൂർ,​ മുംബയ്,​ ചെന്നൈ എന്നിവിടങ്ങളിൽ വില്പന കുത്തനെ കുറഞ്ഞു. 2019ലെ 1,​650-1,​700 ഡോളറിൽ നിന്ന് ടണ്ണിന് വില ഈവർഷം ആയിരം ഡോളറിലേക്ക് ഇടിഞ്ഞിട്ടും കയറ്റുമതി അളവ് ഉയർന്നില്ല.

2019 ഏപ്രിലിലെ 4,​928 ടണ്ണിൽ നിന്ന് 2,​406 ടണ്ണിലേക്കാണ് ഇത്തവണ ഏപ്രിലിൽ കശുഅണ്ടി കയറ്റുമതി ഇടിഞ്ഞത്. നഷ്‌ടം 51.18 ശതമാനം. 5,​068 ടണ്ണിൽ നിന്ന് മേയിൽ കയറ്റുമതി 34.21 ശതമാനം ഇടിഞ്ഞ് 3,​334 ടണ്ണിലെത്തി. ജൂണിൽ 3,​358 ടണ്ണായിരുന്നു കയറ്റുമതി. ഇടിവ് 38.11 ശതമാനം. 2019 ജൂണിൽ 5,​427 ടൺ കയറ്റുമതി ചെയ്‌തിരുന്നു. മേയിൽ കയറ്റുമതി മൂല്യം 147.24 കോടി രൂപയാണ്. നഷ്‌ടം 49.15 ശതമാനം. മേയിൽ 31.87 ശതമാനം ഇടിഞ്ഞ് മൂല്യം 199.50 കോടി രൂപ. ജൂണിൽ ലഭിച്ചത് 206.89 കോടി രൂപ; നഷ്‌ടം 32.94 ശതമാനം.