സെസ്: കയറ്റുമതിയിൽ 45 ശതമാനം ഇടിവ്

ന്യൂഡൽഹി: രാജ്യത്തെ പ്രത്യേക സാമ്പത്തിക മേഖലകളിൽ (സെസ്)​ നിന്നുള്ള കയറ്റുമതി നടപ്പുസാമ്പത്തിക വർഷം ജൂൺ വരെയുള്ള കാലയളവിൽ 45 ശതമാനം ഇടിഞ്ഞുവെന്ന് എക്‌സ്‌പോർട്ട് പ്രമോഷൻ കൗൺസിൽ (ഇ.പി.സി.ഇ.എസ്)​ വ്യക്തമാക്കി. മാനുഫാക്‌ചറിംഗ് കയറ്റുമതി മൂല്യം മുൻവർഷത്തെ സമാന കാലയളവിലെ 75,​436 കോടി രൂപയിൽ 41,​699 കോടി രൂപയിലേക്ക് താഴ്‌ന്നു.

അതേസമയം,​ സോഫ്‌റ്റ്‌വെയർ,​ സേവന കയറ്റുമതി അഞ്ചു ശതമാനം മെച്ചപ്പെട്ടു. 1.05 ലക്ഷം കോടി രൂപയിൽ നിന്ന് 1.11 ലക്ഷം കോടി രൂപയിലേക്കാണ് വർദ്ധന. ഇന്ത്യയിൽ നിന്നുള്ള മൊത്തം കയറ്റുമതി ജൂലായിൽ 10.2 ശതമാനം കുറഞ്ഞിരുന്നു. 2,​364 കോടി ഡോളറാണ് ജൂലായിലെ കയറ്റുമതി വരുമാനം. ഇറക്കുമതിച്ചെലവ് 28.4 ശതമാനം താഴ്‌ന്ന് 2,​847 കോടി ഡോളറായി.

ആഭ്യന്തര വിപണിയിലേക്ക് സെസിൽ നിന്നുള്ള മാനുഫാക്‌ചറിംഗ് ഉത്പന്നങ്ങൾക്ക് ഏർപ്പെടുത്തിയ ഇറക്കുമതി ചുങ്കം 'ആത്മനിർഭർ ഇന്ത്യ" കാമ്പയിന്റെ ഭാഗമായി ഒഴിവാക്കണമെന്ന് ഇ.പി.സി.ഇ.എസ് ആവശ്യപ്പെട്ടു.