കേരള ബിരുദ പ്രവേശനം, ആദ്യ അലോട്ട്മെന്റായി

തിരുവനന്തപുരം: കേരള സർവകലാശാല ബിരുദ പ്രവേശനത്തിനുള്ള ഒന്നാം അലോട്ട്‌മെന്റ് http://admissions.keralauniversity.ac.in ൽ പ്രസിദ്ധീകരിച്ചു. അലോട്ട്‌മെന്റ് ലഭിച്ചവർ അഡ്മിഷൻ വെബ്‌സൈ​റ്റിൽ ലോഗ് ഇൻ ചെയ്ത് സർവകലാശാല ഫീസ് 17-ന് വൈകിട്ട് 5നകം ഓൺലൈനായി അടച്ച് അലോട്ട്‌മെന്റ് ഉറപ്പാക്കണം. ഓൺലൈനായി ഫീസടച്ച ശേഷം ലഭ്യമാകുന്ന വിവരങ്ങൾ അടങ്ങിയ പേജിന്റെ പ്രി​ന്റൗട്ട് എടുത്ത് സൂക്ഷിക്കണം. ഫീസ് അടയ്ക്കാത്തവരുടെ അലോട്ട്‌മെന്റ് റദ്ദാകും. അവരെ അടുത്ത അലോട്ട്‌മെന്റുകളിൽ പരിഗണിക്കില്ല. അലോട്ട്‌മെന്റ് ലഭിച്ചവർ ലഭിച്ച സീ​റ്റിൽ തൃപ്തരല്ലെങ്കിലും തുടർന്നുള്ള അലോട്ട്‌മെന്റുകളിൽ പരിഗണിക്കുന്നതിനായി​ ഫീസടയ്ക്കണം. ഒന്ന്, രണ്ട് അലോട്ട്‌മെന്റുകൾ ലഭിച്ചവർ രണ്ടാം അലോട്ട്‌മെന്റ് പ്രസിദ്ധീകരിച്ചതിന് ശേഷം കോളേജുകളിൽ ഹാജരായാൽ മതി. അലോട്ട്‌മെന്റിൽ തൃപ്തരാണെങ്കിൽ ഫീസടച്ച് അലോട്ട്‌മെന്റ് ഉറപ്പാക്കിയ ശേഷം ഹയർ ഓപ്ഷനുകൾ 17ന് വൈകിട്ട് 5 വരെ നീക്കം ചെയ്യാം. ഹയർ ഓപ്ഷനുകൾ നിലനിറുത്തുന്നവരെ അടുത്ത അലോട്ട്‌മെന്റിൽ ആ ഓപ്ഷനുകളിലേക്ക് പരിഗണിക്കും. ഇവർ അടുത്ത അലോട്ട്‌മെന്റിൽ ലഭിക്കുന്ന സീ​റ്റ് നിർബന്ധമായും സ്വീകരിക്കേണ്ടതാണെന്ന് സർവകലാശാല അറിയിച്ചു.