അകലെ നിന്നാരാണു പാടുന്നു?

അകലെ നിന്നാരാണു

പാടുന്നു പിന്നെയും അതിദുഃഖ സാന്ദ്രമീ ഗാനമീ രാത്രിയിൽ? ചിരകാലസ്വപ്നങ്ങൾ വീണുമയങ്ങിയ കരളിൽ നിന്നുയരുന്ന ഗാനമീ രാത്രിയിൽ? ഒരുഗാന ഗന്ധർവ്വൻ മന്ദ്രമായ്‌ മീട്ടിയ മണിവീണാ തന്ത്രി തൻ നാദമാണോ? ഒരുനാളിലേതോ മുളങ്കാടിനുള്ളിൽ നി- ന്നൊരു വേള ഞാൻ കേട്ട ഗാനമാണോ? പരിചിതമീഗാന- മിതു പണ്ടു ഞാൻ നിന- ക്കെഴുതിയോരനുരാഗ ഗീതമല്ലേ? പലനാളു പിന്നിട്ടു ഞാനിന്നു പിന്നെയും ഇതിലേ നടക്കുമീ സന്ധ്യയിങ്കൽ അഞ്ജാത ഗായകാ! നീ പാടുമീ നഷ്ട- പ്രണയാർദ്ര മധുരമീ വരികളെല്ലാം പണ്ടു ഞാനെഴുതിയ- താണെന്നറിയുന്നു; മധുരമീ നൊമ്പരം നന്ദി ചൊല്ലുന്നു ഞാൻ.