എ.ഡി.ജി.പിയുടെ പേരിൽ ഫേസ്ബുക്കിൽ പണം തട്ടിപ്പ്
സൈബർ ഡോം അന്വേഷണം ആരംഭിച്ചു
തൃക്കാക്കര: എ.ഡി.ജി.പി വിജയ് സാഖറെയുടെ പേരിൽ വ്യാജ ഫേസ്ബുക്ക് അക്കൗണ്ട് സൃഷ്ടിച്ച് പണം തട്ടാൻ ശ്രമിച്ചതിനെക്കുറിച്ച് ഇൻഫോപാർക്ക് സൈബർഡോം അന്വേഷണം ആരംഭിച്ചു.
യഥാർത്ഥ ഫേസ്ബുക്ക് അക്കൗണ്ടിന് സമാനമായ പ്രൊഫൈൽ ചിത്രം ചേർത്താണ് വ്യാജ അക്കൗണ്ട് സൃഷ്ടിച്ചത്. യഥാർത്ഥ ഫേസ്ബുക്ക് സുഹൃത്തുക്കളുമായി സൗഹൃദം സ്ഥാപിച്ച് പണം കടമായി ആവശ്യപ്പെടുന്ന പതിവ് തട്ടിപ്പിനായിരുന്നു ശ്രമം. വിജയ് സാഖറെയുടെ പരാതിയെ തുടർന്നാണ് കേസെടുത്തത്.
കഴിഞ്ഞ തിങ്കളാഴ്ച രാത്രി പതിനൊന്നിന് കളമശേരി സ്വദേശിയും അഭിഭാഷകനും സൈബർ ലാ സ്പെഷ്യലിസ്റ്റുമായ ജിയാസ് ജമാലിനോട് ഗൂഗിൾ പേ വഴി സുഹൃത്തിന്റെ അക്കൗണ്ടിലേക്ക് 10,000 രൂപ അയയ്ക്കാൻ ആവശ്യപ്പെടുകയായിരുന്നു. അക്കൗണ്ട് വ്യാജമാണെന്നു മനസിലാക്കിയ ജിയാസ് എറണാകുളം സൈബർ സെല്ലിനെ വിവരം അറിയിച്ചു. ഡൂപ്ളിക്കേറ്റ് ഫേസ് ബുക്ക് അക്കൗണ്ട് ഇപ്പോൾ ഡിലീറ്റ് ചെയ്തിട്ടുണ്ട്.
• വ്യാജ അക്കൗണ്ട് പെൺകുട്ടിയുടെ പേരിൽ
എ.ഡി.ജി.പിയുടെ പേരിൽ പണം തട്ടാൻ ശ്രമിച്ചത് ഉത്തരേന്ത്യൻ സംഘം. അക്കൗണ്ട് ആദ്യം ഉപയോഗിച്ചിരുന്നത് നീതു ദാസ് എന്ന പേരിലാണ്. പേര് മാറ്റിയാണ് തട്ടിപ്പിന് ശ്രമിച്ചത്. മറ്റ് പലരോടും പണം ആവശ്യപ്പെട്ടിട്ടുണ്ട്.