ഓൺലൈൻ ക്ളാസുകളുടെ സമയം
തിരുവനന്തപുരം: ഇന്ന് മുതൽ വിക്ടേഴ്സ് ചാനലിൽ സംപ്രേഷണം ചെയ്യുന്ന ഫസ്റ്റ് ബെൽ ഡിജിറ്റൽ ക്ളാസുകളുടെ ടൈംടേബിൾ.
അങ്കണവാടി കുട്ടികൾക്കുള്ള 'കിളിക്കൊഞ്ചൽ' ജൂൺ 4 വരെ രാവിലെ 10.30 നായിരിക്കും. പുനഃസംപ്രേഷണം ജൂൺ 7 മുതൽ 10 വരെ.
പ്ലസ്ടു ക്ലാസുകൾക്ക് ജൂൺ 7 മുതൽ 11 വരെയാണ് ആദ്യ ട്രയൽ. രാവിലെ 8.30 മുതൽ 10 വരെയും വൈകിട്ട് 5 മുതൽ 6 വരെദിവസവും അഞ്ചു ക്ലാസുകൾ. 14 മുതൽ 18 വരെ പുനഃസംപ്രേഷണം.
പത്തു വരെ ക്ലാസുകളുടെ ആദ്യ ട്രയൽ ജൂൺ 2 മുതൽ 4 വരെ. ജൂൺ 7 മുതൽ 9 വരെയും ജൂൺ 10 മുതൽ 12വരെയും പുനഃസംപ്രേഷണം ചെയ്യും. പത്താം ക്ലാസിനുള്ള മൂന്നു ക്ലാസുകൾ ഉച്ചയ്ക്ക് 12 മുതൽ 1.30 വരെ.
ഒന്നാം ക്ലാസുകാർക്ക് രാവിലെ 10 നും രണ്ടാം ക്ലാസുകാർക്ക് 11 നും മൂന്നാം ക്ലാസുകാർക്ക് 11.30 നും നാല് (1.30) അഞ്ച് (2) ആറ് (2.30), ഏഴ് (3), എട്ട് (3.30) എന്ന ക്രമത്തിൽ ഓരോ പീരിയഡ് വീതമായിരിക്കും.
ഒൻപതാം ക്ലാസിന് വൈകിട്ട് 4 മുതൽ 5 വരെ രണ്ടു ക്ലാസുകൾ.
ട്രയൽ ക്ലാസിന്റെ അനുഭവംകൂടി കണക്കിലെടുത്തായിരിക്കും തുടർക്ലാസുകളും അന്തിമ ടൈംടേബിളും നിശ്ചയിക്കുന്നതെന്ന് കൈറ്റ് സി.ഇ.ഒ., കെ.അൻവർ സാദത്ത് അറിയിച്ചു.
പ്ളസ് വൺ പരീക്ഷ സെപ്തംബർ 6 മുതൽ
തിരുവനന്തപുരം: പ്ളസ് വൺ പരീക്ഷ സെപ്തംബർ 6 മുതൽ 16 വരെ നടക്കും. രാവിലെ 9.40 ന് പരീക്ഷ തുടങ്ങും. 6 ന് സോഷ്യോളജി, ആന്ത്രപ്പോളജി, ഇലക്ട്രോണിക്സ് സർവീസ് ടെക്നോളജി (ഓൾഡ്), ഇലക്ട്രോണിക് സിസ്റ്റംസ്. 7 ന് കെമിസ്ട്രി, ഹിസ്റ്ററി, ഇസ്ലാമിക് ഹിസ്റ്ററി ആൻഡ് കൾച്ചർ, ബിസിനസ് സ്റ്റഡീസ്, കമ്മ്യൂണിക്കേറ്റീവ് ഇംഗ്ളീഷ്. 8 ന് പാർട്ട് രണ്ട് ലാംഗ്വേജ്, കമ്പ്യൂട്ടർ ഇൻഫർമേഷൻ ടെക്നോളജി (ഓൾഡ്), കമ്പ്യൂട്ടർ സയൻസ് ആൻഡ് ഇൻഫർമേഷൻ ടെക്നോളജി. 9 ന് ബയോളജി, ഇലക്ട്രോണിക്സ്, പൊളിറ്റിക്കൽ സയൻസ്, സാൻസ്ക്രിറ്റ് സാഹിത്യ, കമ്പ്യൂട്ടർ ആപ്ളിക്കേഷൻ, ഇംഗ്ളീഷ് ലിറ്ററേച്ചർ, 10 ന് മാത്തമാറ്റിക്സ്, പാർട്ട് മൂന്ന് ലാംഗ്വേജ്, സാൻസ്ക്രിറ്റ് ശാസ്ത്ര, സൈക്കോളജി, 13 ന് ഫിസിക്സ്, ഇക്കണോമിക്സ്, 14 ന് പാർട്ട് ഒന്ന് ഇംഗ്ളീഷ്, 15 ന് ജോഗ്രഫി, മ്യൂസിക്, സോഷ്യൽ വർക്ക്, ജിയോളജി, അക്കൗണ്ടൻസി, 16 ന് ഹോം സയൻസ്, ഗാന്ധിയൻ സ്റ്റഡീസ്, ഫിലോസഫി, ജേർണലിസം, കമ്പ്യൂട്ടർ സയൻസ്, സ്റ്റാറ്റിസ്റ്റിക്സ്.
പ്ളസ് ടുവിന് എഴുതാനാവില്ല
പ്ളസ് വൺ പരീക്ഷയുടെ ഓരോ പേപ്പറിനും പ്രത്യേകമായി ഗ്രേഡോ നിശ്ചിത സ്കോറോ നേടണമെന്നില്ല. ഓരോ വിഷയത്തിനും ലഭിച്ച സ്കോറുകളുടെ ഷീറ്റ് നൽകും. പ്ളസ് വൺ പരീക്ഷ എഴുതുകയും പ്ളസ് ടു പഠനം പൂർത്തിയാക്കുകയും ചെയ്യുന്നവർക്ക് മാത്രമേ 2022 മാർച്ചിൽ നടക്കുന്ന പ്ളസ് ടു പരീക്ഷയ്ക്ക് രജിസ്റ്റർ ചെയ്യാൻ അർഹതയുണ്ടായിരിക്കുകയുള്ളൂ. പ്ളസ് വണ്ണിന് ഇംപ്രൂവ്മെന്റ് പരീക്ഷയില്ല.
പിഴയില്ലാതെ ഫീസ് 15 വരെ
പിഴ കൂടാതെ ജൂൺ 15 വരെയും 20 രൂപ പിഴയോടെ 19 വരെയും 25 രൂപ പിഴയോടെ 23 വരെയും 600 രൂപ സൂപ്പർ ഫൈനോടെ 26 വരെയും ഫീസടയ്ക്കാം. അപേക്ഷാഫോമുകൾ ഹയർ സെക്കൻഡറി പോർട്ടലിലും ഹയർ സെക്കൻഡറി സ്കൂളുകളിലും കിട്ടും. ഓപ്പൺ സ്കൂൾ വിദ്യാർത്ഥികൾ അവർക്ക് അനുവദിച്ചിട്ടുള്ള പരീക്ഷാ കേന്ദ്രങ്ങളിൽ അപേക്ഷ സമർപ്പിക്കണം. അപേക്ഷ നേരിട്ട് ഡയറക്ടറേറ്റിൽ സ്വീകരിക്കില്ല.