മുളക് പൊടിവിതറി താലിമാല മോഷ്ടിച്ചു
മണ്ണാർക്കാട്: വീട്ടമ്മയ്ക്കു നേരെ മുളകുപൊടി വിതറി മോഷണം. മോഷ്ടാവ് വീട്ടമ്മയുടെ താലിമാല പൊട്ടിച്ചെടുത്തു കടന്നു കളഞ്ഞു. ഗോവിന്ദപുരം കല്ലിങ്ങൽ വീട്ടിൽ ലിഷയുടെ മാലയാണ് നഷ്ടമായത്.
ചൊവ്വാഴ്ച രാത്രി പത്തോടെയായിരുന്നു സംഭവം. സ്വകാര്യ ഹോം അപ്ലയൻസസ് സ്ഥാപനത്തിലെ ജീവനക്കാരിയായ ലിഷ സംഭവ സമയത്ത് വീട്ടിൽ ഒറ്റയ്ക്കായിരുന്നു. വീട്ടിൽ കറന്റ് പോയ സമയത്ത് പുറത്തുനിന്നും വീട്ടമ്മയുടെ പേര് വിളിച്ച് വാതിൽ തുറപ്പിക്കുകയായിരുന്നു. വാതിൽ തുറന്നയുടൻ ലിഷയുടെ മുഖത്തിന് നേരെ മുളക് പൊടി വിതറിയ മോഷ്ടാവ് കഴുത്തിൽ കിടന്ന രണ്ട് പവനിലധികം വരുന്ന താലിമാല പൊട്ടിച്ചെടുത്ത് രക്ഷപെട്ടു. ലിഷയുടെ നിലവിളികേട്ട് അയൽക്കാർ ഓടിയെത്തി സമീപത്തെല്ലാം നോക്കിയെങ്കിലും ആരെയും കണ്ടെത്താനായില്ല. തുടർന്ന് പൊലീസിൽ വിവരം അറിയിച്ചു.