പോരാളിയുടെ കാല്പാടുകൾ തേടി എസ്.പി.സി കാഡറ്റുകൾ

പിലിക്കോട്: ദേശീയ സ്വാതന്ത്ര്യസമര പോരാട്ടത്തിലെ നേതൃനായകന്റെ കാല്പാടുകൾ തേടി എസ്.പി.സി. കാഡറ്റുകൾ. പിലിക്കോട് എരവിലെ സ്വാതന്ത്ര്യ സമര സേനാനി മുണ്ടവളപ്പിൽ കുഞ്ഞിരാമന്റെ ഓർമ്മകൾ തുടിക്കുന്ന മണ്ണിൽ നിന്നും നാടിന്റെ നേർ ചരിത്രത്തെ അറിയാനാണ് തൃക്കരിപ്പൂർ ഗവ. വൊക്കേഷണൽ ഹയർ സെക്കൻഡറി സ്കൂളിലെ എസ്.പി.സി കാഡറ്റുകൾ എത്തിയത്. ദേശീയ സ്വാതന്ത്ര്യ സമരത്തിന്റെ ഭാഗമായി വിപ്ലവ കവി ടി.എസ്. തിരുമുമ്പിനോടൊപ്പം ചേർന്നുനിന്നു പ്രവർത്തിച്ച പോരാളിയായിരുന്നു മുണ്ടവളപ്പിൽ കുഞ്ഞിരാമൻ. ഉപ്പു കുറുക്കൽ സമരത്തിലും മദ്യവിരുദ്ധ സമരങ്ങളിലും നേതൃപരമായ പങ്കു വഹിച്ച അദ്ദേഹത്തിന്റെ എരവിലെ വീട്ടിലായിരുന്നു പരിപാടി. മഹാത്മജി ട്രസ്റ്റ് ചെയർമാൻ കെ. ധനരാജ് അദ്ധ്യക്ഷത വഹിച്ച ചടങ്ങിൽ പി. ഗോപാലകൃഷ്ണൻ മുഖ്യപ്രഭാഷണം നടത്തി. എം.പി. ജയകുമാർ, പി.വി. രാജൻ, കെ. നന്ദ, ഡി. അഭിനന്ദ് സംസാരിച്ചു. കെ.വി. മധുസൂദനൻ, സരിത എന്നിവർ നേതൃത്വം നൽകി.