വിജയ് ബാബു ജോർജി​യയി​ൽ

കൊച്ചി: യുവനടിയെ പീഡിപ്പിച്ച കേസിൽ ദുബായിൽ ഒളിവിൽക്കഴിഞ്ഞ നടനും നിർമ്മാതാവുമായ വിജയ് ബാബു ജോർജി​യയി​ലേക്ക് കടന്നു. ജോർജി​യയുമായി​ ഇന്ത്യയ്ക്ക് കുറ്റവാളി​കളെ കൈമാറാനുള്ള കരാറി​ല്ലെന്നതാകാം നീക്കത്തിന് പിന്നിലെന്ന് പൊലീസ് കരുതുന്നു.

കേസിന്റെ വിവരങ്ങളും വിജയ് ബാബുവിന്റെ പാസ്പോർട്ട് റദ്ദാക്കിയ രേഖകളും വിദേശകാര്യ മന്ത്രാലയംവഴി ജോർജി​യൻ ആഭ്യന്തര മന്ത്രാലയത്തിന് കൈമാറിയിട്ടുണ്ട്. ഇന്റർപോളിന്റെ സഹായത്തോടെ ബ്ലൂകോർണർ നോട്ടീസ് പുറത്തിറക്കും മുമ്പാണ് ദുബായ് വിട്ടത്. വിജയ് ബാബുവിന്റെ പാസ്പോർട്ട് കഴിഞ്ഞ ദിവസം റദ്ദാക്കിയതിനാൽ ഇനി മറ്റൊരു രാജ്യത്തേക്ക് യാത്രചെയ്യാനാകില്ല. എയർപോർട്ടി​ലെത്തി​യാൽ പിടികൂടി​ ഉടൻ ഇന്ത്യയിലേക്ക് അയയ്ക്കും. പാസ്പോർട്ട് റദ്ദാക്കിയതിനാലും ബ്ലൂകോർണർ നോട്ടീസുൾപ്പെടെയുള്ള വിവരങ്ങൾ കൈമാറിയതിനാലും വിസയും ഉടനെ റദ്ദാകും. തുടർന്നുള്ള താമസം അനധികൃതമാകും.

 നീല ചുവപ്പാകും

ഈ മാസം 24നകം ഹാജരായില്ലെങ്കിൽ ഇന്റർപോളിന്റെ സഹായത്തോടെ റെഡ്കോർണർ നോട്ടീസ് പുറപ്പെടുവിക്കാൻ നടപടി സ്വീകരിക്കുമെന്ന് സിറ്റി പൊലീസ് കമ്മിഷണർ സി​.എച്ച്. നാഗരാജു 'കേരളകൗമുദി"യോട് പറഞ്ഞു. 24ന് തിരിച്ചെത്തുമെന്നാണ് വിജയ് ബാബു പാസ്‌പോർട്ട് ഓഫീസറെ അറിയിച്ചിട്ടുള്ളത്.

 ജോർജിയ

സോവിയറ്റ് യൂണിയന്റെ ഭാഗമായിരുന്ന രാജ്യമാണ് കരിങ്കടൽ തീരത്തെ ജോർജിയ. തലസ്ഥാനം ടബലീസി. രണ്ട് പ്രധാന അന്താരാഷ്ട്രവിമാനത്താവളങ്ങളാണ് ഇവിടെയുള്ളത്.