കേരളം ഇന്ത്യയിലെ ഏറ്റവും സുന്ദരമായ സ്ഥലം

 ഈവർഷം കാണേണ്ട ടൈം മാഗസിന്റെ 50 മനോഹരസ്ഥലങ്ങളുടെ പട്ടികയിൽ കേരളവും

തിരുവനന്തപുരം: ഇന്ത്യയിലെ ഏറ്റവും സുന്ദരമായ സ്ഥലമാണ് കേരളമെന്നും 2022ൽ തീർച്ചയായും യാത്രചെയ്യേണ്ട ലോകത്തെ 50 സ്ഥലങ്ങളിലൊന്ന് കേരളമാണെന്നും ടൈം മാഗസിന്റെ സർവേ റിപ്പോർട്ട്. കേരളത്തിലെ ബീച്ചുകളും കായലുകളും മലനിരകളും മനോഹരമാണെന്നും രാജ്യാന്തര ട്രാവൽ ജേർണലിസ്‌റ്റുകളുടെ അഭിപ്രായങ്ങൾ കോർത്തിണക്കിയ റിപ്പോർട്ടിലുണ്ട്.

ആയുർവേദവും ഹൗസ്ബോട്ടുകളും കാരവൻ ടൂറിസവും വാഗമണ്ണിലെ കാരവൻ പാർക്കുമെല്ലാം കേരളത്തെ പ്രത്യേകം പുകഴ്‌ത്തുന്ന റിപ്പോർട്ടിൽ ഇടംപിടിച്ചു. കൊവിഡ് പ്രതിസന്ധിയിൽ നിന്ന് കേരളാ ടൂറിസത്തെ അതിവേഗം ഉണ‌ർവിലേക്ക് നയിക്കാൻ ടൂറിസം വകുപ്പ് നടപ്പാക്കിയ പ്രവർത്തനങ്ങൾക്കുള്ള അംഗീകാരമാണ് ടൈമിന്റെ റിപ്പോർട്ടെന്ന് മന്ത്രി പി.എ.മുഹമ്മദ് റിയാസ് ഫേസ്ബുക്കിൽ പറഞ്ഞു. സർവേയിൽ കേരളത്തിനൊപ്പം അഹമ്മദാബാദും ഇടംനേടിയിട്ടുണ്ട്.