പണം തട്ടിയെടുത്തയാൾ പിടിയിൽ
Friday 22 July 2022 1:37 AM IST
കൊല്ലങ്കോട്: ഗ്ലോബൽ മണി ട്രാൻസ്ഫർ എന്ന സ്വകാര്യ ധനകാര്യ സ്ഥാപനത്തിൽ നിന്ന് 30,000 രൂപ തട്ടിയെടുത്തയാളെ പുതുനഗരം പൊലീസ് അറസ്റ്റ് ചെയ്തു. കണ്ണൂർ ഇരിട്ടിയിൽ താമസിക്കുന്ന എറണാകുളം വടുതല സ്വദേശി സി.ഡി സജേഷാണ് അറസ്റ്റിലായത്. ബാങ്ക് അക്കൗണ്ട് നമ്പറിലേക്ക് 30,000 രൂപ അയക്കാൻ പറയുകയും തുക കൈപ്പറ്റിയ ശേഷം പണമായി തിരികെ തരാമെന്ന് ജീവനക്കാരെ പറഞ്ഞ് വിശ്വസിപ്പിച്ചായിരുന്നു തട്ടിപ്പ്. അക്കൗണ്ടിൽ പണം നിക്ഷേപിച്ച ശേഷം പണം തിരികെ നൽകാതിരുന്നതിനാൽ ജീവനക്കാർ പൊലീസിൽ പരാതി നൽകുകയായിരുന്നു. കോഴിക്കോട് 50,000 രൂപയും മട്ടന്നൂരിൽ മൂന്നര ലക്ഷം രൂപയും തട്ടിയെടുത്ത കേസിലും ഇയാൾ പ്രതിയാണ്. പുതുനഗരം സി.ഐ എ. ദീപകുമാറിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ പിടികൂടിയത്. ഇയാളെ കോടതിയിൽ ഹാജരാക്കി റിമാന്റ് ചെയ്തു.