28 കുപ്പി വിദേശ മദ്യവുമായി വൃദ്ധൻ പിടിയിൽ

കൊല്ലം: ഡ്രൈഡേയിൽ വിൽപ്പനയ്ക്കായി അനധികൃതമായി സൂക്ഷിച്ച 28 കുപ്പി ഇന്ത്യൻ നിർമ്മിത വിദേശ മദ്യവുമായി വൃദ്ധൻ കണ്ണനല്ലൂർ പൊലീസിന്റെ പിടിയിലായി. കണ്ണനല്ലൂർ ചേരിക്കോണം തടവിള വീട്ടിൽ മുഹമ്മദ് ഹനീഫയാണ് (63) പിടിയിലായത്. സ്വാതന്ത്റ്യദിനത്തിൽ ബിവറേജസ് ഔട്ട്‌ലെ​റ്റുകൾക്ക് അവധിയായിരുന്നതിനാൽ വിൽപ്പനയ്ക്കായി അര ലി​റ്റർ വീതം 28 കുപ്പികളിലായി സൂക്ഷിച്ചിരുന്ന 14 ലിറ്റർ വിദേശ മദ്യമാണ് പിടിച്ചെടുത്തത്. കണ്ണനല്ലൂർ എസ്.എച്ച്.ഒ ഡി.സജീവിന്റെ നേതൃത്വത്തിൽ എസ്.ഐ സജീവ്, എ.എസ്.ഐ ഹരിസോമൻ, എസ്.സി.പി.ഒമാരായ നജീബ്, രതീഷ് കുമാർ, സി.പി.ഒമാരായ അനിൽ കുമാർ, സെബാസ്​റ്റ്യൻ എന്നിവരടങ്ങിയ സംഘമാണ് ഇയാളെ പിടികൂടിയത്.