കാനപണി തുടങ്ങിയപ്പോൾ റോഡ് പാതിയായി!

ഫോർട്ടുകൊച്ചി: പൊലീസ് സ്റ്റേഷൻ മുതൽ വെളിവരെയുള്ള 50 അടി റോഡ് കാന നിർമ്മാണത്തോടെ 20 അടിയായി ഒതുങ്ങിയതോടെ ജനങ്ങൾ നേരിടുന്നത് കടുത്ത യാത്രാദുരിതം. ഞാലിപ്പറമ്പ്, ചിരട്ടപ്പാലം,​ പട്ടാളം, അമരാവതി, വെളി ഗ്രൗണ്ട് റോഡുകളെ ബന്ധിപ്പിക്കുന്നതാണ് ഈ റോഡ്.

കാനകളുടെ നിർമ്മാണം ഇപ്പോഴും നടക്കുന്നു. ബസ് റൂട്ട് ആയതിനാൽ ഇവിടെ വലിയ അപകടസാദ്ധ്യതയ്ക്കും ഇതു വഴിവച്ചിരിക്കുകയാണെന്ന് പ്രദേശവാസികൾ പറയുന്നു. കരാറുകാരുടെ അപ്രായോഗികമായ ഇത്തരം വികസന പ്രവർത്തനങ്ങൾ നിറുത്തിവയ്ക്കാൻ കോടതിയും മേയറും ഇടപെടണമെന്നും അന്വേഷണം വേണമെന്നും പൊതുപ്രവർത്തകൻ കെ.എ. മുജീബ് റഹ്മാൻ ആവശ്യപ്പെട്ടു.