കേരള സർക്കാരിന്റെ എഴുത്തച്ഛന് പുരസ്കാരം സേതുവിന്
കോട്ടയം: മലയാളസാഹിത്യത്തിന് നല്കിയ സമഗ്രസംഭാവന പരിഗണിച്ച് കേരള സര്ക്കാരിന്റെ ഏറ്റവും വലിയ സാഹിത്യബഹുമതിയായ എഴുത്തച്ഛന് പുരസ്കാരം ( 2022) സേതുവിന്. സാംസ്കാരികവകുപ്പ് മന്ത്രി വി എൻ വാസവൻ കോട്ടയത്ത് വച്ചാണ് പുരസ്കാര പ്രഖ്യാപനം നടത്തിയത്. അഞ്ച് ലക്ഷം രൂപയും പ്രശസ്തിപത്രവും ശിൽപ്പവുമടങ്ങുന്നതാണ് പുരസ്കാരം.
കേരളസാഹിത്യഅക്കാഡമി പ്രസിഡന്റ് കെ സച്ചിദാനന്ദന് ചെയര്മാനും പ്രൊഫസര് എം കെ സാനു, വൈശാഖന്, കാലടി ശ്രീശങ്കരാചാര്യ സര്വകലാശാല വൈസ് ചാന്സലര് ഡോ എം വി നാരായണന്, സാംസ്കാരികവകുപ്പ് പ്രിന്സിപ്പല് സെക്രട്ടറി റാണി ജോര്ജ് ഐ എ എസ് എന്നിവരംഗങ്ങളുമായ വിധിനിര്ണയസമിതിയാണ് 2022ലെ എഴുത്തച്ഛന് പുരസ്കാരം നോവലിസ്റ്റും കഥാകൃത്തുമായ സേതുവിന് സമര്പ്പിക്കാന് ഏകകണ്ഠമായി ശുപാര്ശ ചെയ്തത്.
മലയാളകഥയിലും നോവലിലും സ്വന്തമായ ഒരിടം കണ്ടെത്തിയ മുതിർന്ന എഴുത്തുകാരനാണ് സേതു. സൗത്ത് ഇന്ത്യൻ ബാങ്കിന്റെ ചെയർമാൻ, സ്റ്റേറ്റ് ബാങ്ക് ഒഫ് ട്രാവൻകൂർ ബാങ്കിന്റെ ഡയറക്ടർ, നാഷണൽ ബുക്ക് ട്രസ്റ്റ് ഒഫ് ഇന്ത്യയുടെ ചെയർമാൻ തുടങ്ങിയ വലിയ പദവികളിൽ മഹത്തായ സംഭാവനകൾ നൽകിയ ശ്രേഷ്ഠവ്യക്തിത്വമാണ് അദ്ദേഹം.