ഒൻപത് വയസിനിടെ 33 തവണ മലകയറി കുഞ്ഞു മാളികപ്പുറം

എഴുകോൺ: ഒൻപത് വയസിനിടെ 33 തവണ ശബരിമല ശാസ്താവിനെ ദർശിച്ച കുഞ്ഞു മാളികപ്പുറം താരമായി. എഴുകോൺ കോതേത്ത് വീട്ടിൽ അഭിലാഷ് മണിയുടെയും നീതുലക്ഷ്മിയുടെയും ഏക മകളായ അദ്രിതി തനയയാണ് ആ കൊച്ചുമിടുക്കി.

ഉണ്ണി മുകുന്ദന്റെ ഏറ്റവും പുതിയ സിനിമയായ മാളികപ്പുറത്തിന്റെ റിലീസിന് മുന്നോടിയായി എറണാകുളത്ത് നടന്ന പ്രമോഷൻ പരിപാടിയിൽ പങ്കെടുത്തതോടെ ഇപ്പോൾ സാമൂഹ്യ മാദ്ധ്യമങ്ങളിലും അദ്രിതിയുടെ വിശേഷങ്ങൾ വൈറലാണ്.

ഒൻപത് മാസം പ്രായമുള്ളപ്പോഴാണ് അദ്രിതി ശബരിമലയിൽ ആദ്യ ദർശനം നടത്തിയത്. പിന്നീട് ഒട്ടുമിക്ക മാസങ്ങളിലും മലയ്ക്ക് പോകുന്ന മാളികപ്പുറം കഴിഞ്ഞ ഒക്ടോബർ 22 നാണ് ഒടുവിൽ ശബരിമലയിലെത്തിയത്. നവംബറിലും ദർശനത്തിന് മാലയിട്ടെങ്കിലും അച്ചാച്ഛനായ മണിയുടെ മരണത്തെ തുടർന്ന് വ്രതം മുറിഞ്ഞു.

അദ്രിതിയുടെ അച്ഛൻ അഭിലാഷ് മണിയും ഇതിനകം 175 ലേറെ തവണ മല ചവിട്ടി. കൊവിഡ് കാലത്ത് മാത്രമാണ് ഇടവേളകളുണ്ടായതെന്നും അഭിലാഷ് പറയുന്നു.

എഴുകോണിലെ ലക്ഷ്വറി ഹോട്ടലായ നിള പാലസിലെ മാർക്കറ്റിംഗ് എക്സിക്യുട്ടീവാണ്

അഭിലാഷ് മണി. മുതുപിലാക്കാട് മാർ ബസേലിയസ് എൻജിനിയറിംഗ് കോളേജിലെ ഇംഗ്ലീഷ് അദ്ധ്യാപികയാണ് നീതുലക്ഷ്മി.