• വൈപ്പിൻ ബസുകളുടെ പട്ടണ പ്രവേശം ആർക്കും എതിർപ്പില്ല, പക്ഷേ നടക്കുന്നില്ല
ബസുടമകളും, ജീവനക്കാരും, യാത്രക്കാരും, മോട്ടോർ വാഹന വകുപ്പ് അധികൃതരും രാഷ്ട്രീയ പാർട്ടികളും ജനപ്രതിനിധികളും ഗതാഗത മന്ത്രിയും സർക്കാരും നഗരത്തിലേക്ക് വൈപ്പിൻ ബസുകൾ എത്തുന്നതിനെ എതിർക്കുന്നില്ല. പക്ഷേ 18 വർഷമായി ഈ പ്രശ്നത്തിന് പരിഹാരമില്ല.
• ഹൈബി ഈഡൻ എം.പി. 10ന് സത്യാഗ്രഹത്തിന്
കൊച്ചി: വൈപ്പിൻ ദ്വീപിൽ നിന്നുള്ള ബസുകളുടെ നഗരപ്രവേശന വിഷയം വീണ്ടും രാഷ്ട്രീയ പോരിലേക്ക്. ജനുവരി 10ന് ഹൈബി ഈഡൻ എം.പി. 24 മണിക്കൂർ സത്യാഗ്രഹം പ്രഖ്യാപിച്ചതോടെ പ്രശ്നം വീണ്ടും ചൂടുപിടിച്ചു. വൈപ്പിൻ എം.എൽ.എ കെ.എൻ.ഉണ്ണിക്കൃഷ്ണന്റെ വിശദീകരണ വാർത്താസമ്മേളനവും ഇന്ന് വിളിച്ചിട്ടുണ്ട്.
ബസുകളുടെ നഗരപ്രവേശം യാത്രികർക്ക് ഗുണകരമാകുമെന്ന് കൊച്ചി മെട്രോപൊളിറ്റൻ ട്രാൻസ്പോർട്ട് അതോറിട്ടിയുടെ (കെ.എം.ടി.എ) നിർദേശ പ്രകാരം നടത്തിയ നാറ്റ്പാക് പഠനത്തിൽ വ്യക്തമാക്കിയിരുന്നു. കഴിഞ്ഞ വർഷം റിപ്പോർട്ടും സമർപ്പിച്ചു.
മെട്രോ സർവീസിനും കൊവിഡിനും ശേഷം സിറ്റി ബസുകളിൽ 30 ശതമാനത്തോളം ഇല്ലാതായതോടെ, വൈപ്പിൻ ബസുകൾ നഗരത്തിൽ ഗതാഗതപ്രശ്നം രൂക്ഷമാക്കുമെന്ന പൊലീസ് വാദത്തിനും പ്രസക്തിയില്ലാതായി.
ഹൈക്കോടതി ജംഗ്ഷനിൽ ട്രിപ്പ് അവസാനിക്കുന്ന ബസുകളിൽ നിന്നിറങ്ങി വേറെ ബസുകളിൽ കയറി വേണം വൈപ്പിനിൽ നിന്നുള്ളവർ സഞ്ചരിക്കാൻ. ജെട്ടി സ്റ്റാൻഡിൽ നിന്നുള്ള കുറച്ചു കെ.എസ്.ആർ.ടി.സി ബസുകൾ മാത്രമാണ് നഗരത്തിനുളള്ളിലേക്ക് പ്രവേശിക്കുന്നത്.
നാറ്റ്പാക്ക് ശുപാർശ ചെയ്ത റൂട്ടുകൾ
കലൂർ, കാക്കനാട്, കളമശേരിയിലേക്ക്
മേനക, പള്ളിമുക്ക് വഴി തേവര
മേനക, പള്ളിമുക്ക് വഴി വൈറ്റില ഹബ്ബ്
കലൂർ, കടവന്ത്ര വഴി വൈറ്റില ഹബ്ബ്
വൈപ്പിൻ ബസുകൾ
മുനമ്പത്ത് നിന്ന് 25
ചെറായി വഴി 60
കൊടുങ്ങല്ലൂർ പാലം വഴി 8
ഷട്ടിൽ സർവീസ് 27
നാറ്റ് പാക് കണക്ക്
78 ബസുകൾ
349 ട്രിപ്പുകൾ
18 വർഷമായുള്ള ആവശ്യമാണ്. പരീക്ഷണത്തിനായി ഹൈക്കോടതിയിൽ രണ്ട് മണിക്കൂറോളം വിശ്രമിക്കുന്ന 40 ബസുകളുടെ പട്ടിക ആർ.ടി.ഒയ്ക്കും നാറ്റ്പാക്കിനും കൈമാറിയിട്ട് തന്നെ എട്ടുമാസം കഴിഞ്ഞു. പരീക്ഷണത്തിന് ഒരു ബസിന്റെ പോലും സമയക്രമവും മാറ്റേണ്ടതില്ല.
• പി.കെ.ലെനിൻ, പറവൂർ മേഖലാ പ്രസിഡന്റ്
പി.ബി.ഒ.എ.
സമരത്തിന് പിന്നിൽ രാഷ്ട്രീയം
പ്രശ്നത്തിൽ ഒരു നിവേദനം പോലും എം.പി.യോ എം.എൽ.എയോ നൽകിയിട്ടില്ല. ഗ്രാമപ്രദേശങ്ങളിൽ വരുന്ന മൊഫ്യൂസൽ ബസുകളുടെ പരിധിയിലാണ് വൈപ്പിൻ ബസുകൾ. ഇതുൾപ്പടെ നിയമപരമായ നൂലാമാലകാണ് വൈപ്പിൻ ബസുകളുടെ പട്ടണപ്രവേശം വൈകിപ്പിക്കുന്നത്. അനുമതിയുടെ അവസാനഘട്ടമായപ്പോൾ രാഷ്ട്രീയ മുതലെടുപ്പിന് വേണ്ടിയാണ് കോൺഗ്രസുകാർ സമരത്തിനിറങ്ങുന്നത്.
കെ.എൻ. ഉണ്ണികൃഷ്ണൻ എം.എൽ.എ