സ്ത്രീ സമത്വം നേടിയെടുക്കും: പി.കെ ശ്രീമതി

തിരുവനന്തപുരം: രാജ്യത്ത് വനിതകളുടെ നീറുന്ന പ്രശ്നങ്ങൾക്ക് പരിഹാരം കാണാനുള്ള ശ്രമം തുടരുമെന്ന് അഖിലേന്ത്യ ജനാധിപത്യ മഹിളാ അസോസിയേഷൻ ദേശീയ പ്രസിഡന്റായി തിരഞ്ഞെടുക്കപ്പെട്ട പി.കെ ശ്രീമതി, ജനറൽ സെക്രട്ടറി മറിയം ധാവ്ളെ, ട്രഷറർ എസ്. പുണ്യവതി എന്നിവർ വാർത്താസമ്മേളനത്തിൽ പറഞ്ഞു. വിഷയാധിഷ്ഠിത പോരാട്ടങ്ങൾക്കായി രാജ്യത്തെ എല്ലാ ജനാധിപത്യ, മതേതര സംഘടനകളുമായും കൈകോർക്കും.

ജനാധിപത്യവും മതേതരത്വവും പുലരാത്ത രാജ്യത്ത് തുല്യതയും സമത്വവുമുണ്ടാകില്ലെന്നും അതിനാൽ, മതേതര ശക്തികളെ ശക്തിപ്പെടുത്താനുള്ള ശ്രമങ്ങൾ തുടരുമെന്നും പി.കെ ശ്രീമതി പറഞ്ഞു. തുല്യത എന്ന വാക്കിൽ നിന്ന് കടുകിട പിന്നോട്ടു പോകില്ല. ജനാധിപത്യ, മതനിരപേക്ഷ അവകാശങ്ങൾക്കായി പോരാട്ടം തുടരും. സ്ത്രീയായതുകൊണ്ടു മാത്രം യാതന അനുഭവിക്കേണ്ടി വരുന്ന ഒരു വിഭാഗം രാജ്യത്തുണ്ട്. ഭരിക്കുന്നവർ തന്നെ രാജ്യത്തെ ഭിന്നിപ്പിക്കാനുള്ള ശ്രമം നടത്തുമ്പോൾ സമത്വത്തിനായി പോരാടുകയെന്നത് ആവശ്യവും ഉത്തരവാദിത്വവുമാണ്. ഇന്നല്ലെങ്കിൽ നാളെ രാജ്യത്ത് സ്ത്രീ സമത്വം നേടിയെടുക്കുമെന്നും ശ്രീമതി പറഞ്ഞു.

സംഘപരിവാർ നിശ്ചയിക്കുന്ന മനുവാദി അജണ്ടകൾക്കെതിരെയും കോർപ്പറേറ്റുകളുടെയും വർഗീയ വാദികളുടെയും കൂട്ടുകെട്ടിനെതിരെയും പ്രക്ഷോഭം ശക്തമാക്കുമെന്ന് മറിയം ധാവ്ളെ പറഞ്ഞു. സ്ത്രീ സംരക്ഷണത്തിനായുള്ള നിയമങ്ങളിൽ കേന്ദ്രസർക്കാർ വെള്ളം ചേർക്കുകയാണ്. ഇത്തരം നിലപാടുകൾക്കും വർഗീയ ശക്തികൾക്കുമെതിരെ രാജ്യത്തെ സ്ത്രീകളെ ഒന്നിപ്പിക്കും. പാർശ്വവത്കരിക്കപ്പെട്ട വിഭാഗങ്ങളിൽ നിന്നുള്ളവർക്കും ചെറുപ്പക്കാർക്കും സംഘടനയിൽ പ്രാതിനിധ്യം ഉറപ്പാക്കിയതായി വൈസ് പ്രസിഡന്റ് മാലിനി ഭട്ടാചാര്യ പറഞ്ഞു.