ലോകകപ്പ് ഹോക്കി : ഇന്ത്യ ഇന്ന് ഇംഗ്ളണ്ടിനെതിരെ
റൂർക്കേല : ഒഡിഷയിൽ നടക്കുന്ന ലോകകപ്പ് ഹോക്കി ടൂർണമെന്റിലെ തങ്ങളുടെ രണ്ടാം മത്സരത്തിൽ ആതിഥേയരായ ഇന്ത്യ ഇന്ന് ഇംഗ്ളണ്ടിനെ നേരിടും. റൂർക്കേലയിലെ പുതിയ സ്റ്റേഡിയത്തിൽ രാത്രി ഏഴുമണിമുതലാണ് മത്സരം.
ഇതേവേദിയിൽ നടന്ന ആദ്യമത്സരത്തിൽ സ്പെയ്നിനെ മറുപടിയില്ലാത്ത രണ്ടുഗോളുകൾക്ക് തോൽപ്പിച്ച് ഇന്ത്യ വിജയത്തുടക്കമിട്ടിരുന്നു. 12-ാം മിനിട്ടിൽ അമിത് രോഹിതാസും 23-ാം മിനിട്ടിൽ ഹാർദിക്കുമാണ് ഇന്ത്യയുടെ ഗോളുകൾ നേടിയത്. എന്നാൽ മൂന്നാം ക്വാർട്ടറിൽ ഒരു പെനാൽറ്റി സ്ട്രോക്ക് പാഴാക്കിയത് ഉൾപ്പടെയുള്ള തിരിച്ചടികളും മത്സരത്തിൽ ഇന്ത്യയ്ക്കുണ്ടായി.
ഇംഗ്ളണ്ട് ആദ്യ മത്സരത്തിൽ മറുപടിയില്ലാത്ത അഞ്ചുഗോളുകൾക്കാണ് ഇന്ത്യയെ തോൽപ്പിച്ചിരുന്നത്. മികച്ച ആക്രമണനിരയുള്ള ഇംഗ്ളണ്ടിനെ തടുത്തുനിറുത്തുക ഇന്ത്യയ്ക്ക് വലിയ വെല്ലുവിളിയാകും. ഡിഫൻഡർമാർക്ക് കൂടുതൽ അദ്ധ്വാനിക്കേണ്ടിവരും. ലഭിക്കുന്ന അവസരങ്ങൾ പ്രയോജനപ്പെടുത്തേണ്ടതും അനിവാര്യമാണ്.
മത്സരത്തിന്റെ ടിക്കറ്റുകൾ പൂർണമായും വിറ്റഴിഞ്ഞിട്ടുണ്ട്. ഇന്ത്യയുടെ ആദ്യ മത്സരവും കാണികളുടെ നിറഞ്ഞ പങ്കാളിത്തത്തിലാണ് നടന്നത്.