പ്രവാസികൾക്ക് ആശ്വാസം,​ ഇൻഡിഗോ നിറുത്തി വച്ചിരുന്ന രണ്ട് വിമാനസർവീസുകൾ പുനരാരംഭിക്കുന്നു

റിയാദ് : സൗദിയിൽ നിന്ന് കേരളത്തിലേക്കുള്ള രണ്ട് വിമാന സർവീസുകൾ ഇൻഡിഗോ വിമാനകമ്പനി പുനരാരംഭിക്കുന്നു. ജിദ്ദ - കോഴിക്കോട്,​ ദമ്മാം- കോഴിക്കോട് വിമാന സർവീസുകളാണ് മാർച്ച് 26 മുതൽ ഇൻഡിഗോ പുനരാരംഭിക്കുന്നത്,​ ഇതിനായുള്ള ടിക്കറ്റുകൾ കമ്പനിയുടെ വെബ്സൈറ്റിലും ട്രാവൽ ഏജൻസികളിലും ഇതിനോടകം ലഭ്യമായിട്ടുണ്ട്.

ജിദ്ദയിൽ നിന്ന് എല്ലാ ദിവസവും രാത്രി 12.40നാണ് വിമാനം പുറപ്പെടുക. രാവിലെ ഒമ്പതിന് കോഴിക്കോടെത്തും. തിരിച്ച് രാത്രി 8.30ന് കോഴിക്കോട്ട് നിന്ന് പുറപ്പെടുന്ന വിമാനം രാത്രി 11.30ന് ജിദ്ദയിലിറങ്ങും,​ ദമ്മാമിൽ നിന്ന് രാവിലെ 11.40നാണ് സർവീസ്. വൈകിട്ട് 6.50ന് കോഴിക്കോട്ടെത്തും,​ കോഴിക്കോട് ദമ്മാം സർവീസ് രാവിലെ 8.40നാണ്. രാവിലെ 10.40ന് ദമ്മാമിലിറങ്ങും. നേരത്തെ ഈ സെക്ടറുകളിൽ സർവീസ് നടത്തിയിരുന്ന ഇൻഡിഗോ പിന്നീട് സർവീസുകൾ നിറുത്തി വച്ചിരിക്കുകയായിരുന്നു.