മനുഷ്യ- വന്യജീവി സംഘർഷം തടുക്കാൻ വനസൗഹൃദ സദസ്

തൃശൂർ: വനാതിർത്തി പ്രദേശങ്ങളിൽ താമസിക്കുന്ന ജനങ്ങൾ നേരിടുന്ന പ്രശ്‌നം പരിഹരിക്കുന്നതിന് വനം വകുപ്പിന്റെ കീഴിൽ വനസൗഹൃദ സദസ് ഒരുങ്ങുന്നു. വനാതിർത്തി പ്രദേശങ്ങളിലെ ജനങ്ങളിൽ നിന്ന് ലഭിച്ച പരാതികൾ പരിഹരിക്കാനും മനുഷ്യ വന്യജീവി സംഘർഷം ലഘൂകരിക്കാനുമുള്ള മാർഗ്ഗ നിർദ്ദേശം നൽകാനും ലക്ഷ്യമിട്ടാണ് സൗഹൃദ സദസ് ഒരുങ്ങുന്നത്.

സംസ്ഥാനത്ത് വനവുമായി അതിർത്തി പങ്കിടുന്ന നിയോജകമണ്ഡലങ്ങളിലെ പഞ്ചായത്തുകളിൽ 20 വേദികളിലായാണ് പ്രശ്‌ന പരിഹാരത്തിനായി സദസ് നടക്കുന്നത്. വനവുമായി അതിർത്തി പങ്കിടുന്ന ചേലക്കര, കുന്നംകുളം, വടക്കാഞ്ചേരി, ഒല്ലൂർ, പുതുക്കാട്, ചാലക്കുടി തുടങ്ങിയ നിയോജകമണ്ഡലങ്ങളിലെ പഞ്ചായത്തുകളിലെയും മുനിസിപ്പാലിറ്റിയിലെയും ഡിവിഷൻ, ബ്ലോക്ക് മെമ്പർമാർ, പഞ്ചായത്ത് പ്രസിഡന്റുമാർ, വാർഡ് മെമ്പർമാർ തുടങ്ങിയവരെ ഇരു സദസുകളിലായി മന്ത്രിമാർ അഭിസംബോധന ചെയ്യും.

സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ച് വനാതിർത്തി പ്രദേശങ്ങളിലെ വനസൗഹൃദ ജീവിതത്തിനായി സർക്കാർ ഒരുക്കുന്ന കർമ്മപരിപാടിയായ സൗഹൃദ സദസിന്റെ സ്വാഗത സംഘം രൂപീകരണവും പൂർത്തീകരിച്ചു. ഏപ്രിൽ 28 വരെ സംസ്ഥാനത്തുടനീളം വനസൗഹൃദ സദസ് നടക്കുന്നുണ്ട്. വിവിധ ഓഫീസുകളിൽ ലഭിച്ച പൊതുജനങ്ങളുടെ പരാതി പരിഹരിക്കുന്നതോടൊപ്പം മാർഗ്ഗ നിർദ്ദേശം വിദഗ്ദ്ധരിൽ നിന്നും പൊതുജനങ്ങളിൽ നിന്നും സ്വീകരിക്കും. വനംവകുപ്പ് കൈക്കൊണ്ടതും സ്വീകരിച്ചുവരുന്നതുമായ പദ്ധതികളും വിശദീകരിക്കും.

വനാതിർത്തി പങ്കിടുന്ന നിയോജക മണ്ഡലങ്ങൾ: 51
പഞ്ചായത്തുകൾ: 221
ജില്ലയിലെ പഞ്ചായത്തുകൾ: 24

മൂന്ന് മന്ത്രിമാരെത്തും

വന സൗഹൃദ സദസുകൾ ഏപ്രിൽ 17ന് നിയോജകമണ്ഡലങ്ങളിലെ കേന്ദ്രങ്ങളിൽ വനംമന്ത്രി എ.കെ.ശശീന്ദ്രൻ ഉദ്ഘാടനം ചെയ്യും. പട്ടികജാതി, പട്ടികവർഗ ദേവസ്വം മന്ത്രി കെ.രാധാകൃഷ്ണൻ, റവന്യൂമന്ത്രി കെ.രാജൻ എന്നിവർ മുഖ്യാതിഥികളായി സദസുകളിൽ പങ്കെടുക്കും.

കർഷകർക്ക് നഷ്ടപരിഹാരം നൽകും: മന്ത്രി

കാട്ടാനയിറങ്ങി കൃഷി നശിപ്പിച്ച തോന്നൂർക്കര പടിഞ്ഞാറ്റുമുറി മാട്ടുങ്ങൽ പ്രദേശത്തെ കുണ്ടുകുളം ബാബു, കോട്ടയിൽ കേശവൻ എന്നിവരുടെ കൃഷിയിടങ്ങൾ മന്ത്രി കെ.രാധാകൃഷ്ണൻ സന്ദർശിച്ചു. കർഷകർക്ക് അർഹമായ നഷ്ടപരിഹാരം ലഭ്യമാക്കാനുള്ള നടപടി സ്വീകരിക്കുമെന്നും മന്ത്രി അറിയിച്ചു. വാഴാനി ഫോറസ്റ്റ് സ്‌റ്റേഷനിലെ സെക്ഷൻ ഫോറസ്റ്റ് ഓഫീസർമാരായ കെ.എസ്.ബിനു, വി.എ.അനിൽകുമാർ എന്നിവർ ഒപ്പമുണ്ടായി. കർഷക പ്രതിനിധികളായ കെ.നന്ദകുമാർ, ടി.എൻ.പ്രഭാകരൻ, ഒ.എസ്.സജി, പി.എസ്.അജയകുമാർ, ജോമോൻ കാട്ടൂർ എന്നിവരുമായി മന്ത്രി ചർച്ച നടത്തി.