തൃശൂർ : നീണ്ട ഇടവേളയ്ക്ക് ശേഷം സന്തോഷത്തിന്റെയും ഒത്തുചേരലിന്റെയും ദിവസങ്ങളിലേയ്ക്ക് വിദ്യാർത്ഥികൾ തിരിച്ചെത്തുകയാണെന്ന് മന്ത്രി പ്രൊഫ.ആർ ബിന്ദു. ജില്ലാതല പ്രവേശനോത്സവത്തിന്റെ ഉദ്ഘാടനം അമ്മാടം സെന്റ് ആന്റണീസ് എച്ച്.എസ.്എസിൽ ഓൺലൈനായി നിർവഹിക്കുകയായിരുന്നു മന്ത്രി.
അദ്ധ്യാപകരിൽ നിന്ന് നേരിട്ട് പാഠങ്ങൾ കേൾക്കാനും പഠിക്കാനും സ്കൂൾ മുറ്റത്ത് കളിക്കാനും വീണ്ടും സാഹചര്യം ഒരുങ്ങി. വിദ്യാർത്ഥികളെ സംബന്ധിച്ചിടത്തോളം സുഹൃത്തുക്കളുമായുള്ള പഴയ ഒത്തുചേരൽ കാലത്തേക്കുള്ള തിരിച്ചുപോക്ക് കൂടിയാണിത്. ഇതിനൊപ്പം സർഗാത്മക, കായിക പ്രവർത്തനങ്ങളും ഇനി സജീവമാവുകയാണെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്റ് പി.കെ ഡേവിസ് മാസ്റ്റർ അദ്ധ്യക്ഷത വഹിച്ചു. സ്കൂളിലെ അദ്ധ്യാപകരും അനദ്ധ്യാപകരും ചേർന്ന് രചിച്ച് ഈണം നൽകിയ ഗാനം അവർ തന്നെ വേദിയിൽ അവതരിപ്പിച്ചു. വരികൾക്ക് വിദ്യാർത്ഥിനികൾ ചുവടുകൾ വച്ചു. കളക്ടർ ഹരിത വി. കുമാർ, ജില്ലാ പഞ്ചായത്ത് പ്രസിഡന്റ് എന്നിവർ ചേർന്ന് വിദ്യാർത്ഥികൾക്ക് വിദ്യാ ദീപം പകർന്നു. നടൻ ജയരാജ് വാര്യർ, പൊതു വിദ്യാഭ്യാസ അഡീഷ്ണൽ ഡയറക്ടർ സി.എ. സന്തോഷ് എന്നിവർ മുഖ്യാതിഥികളായി. ജില്ലാ പഞ്ചായത്ത് വൈസ് പ്രസിഡന്റ് ഷീന പറയങ്ങാട്ടിൽ, പാറളം പഞ്ചായത്ത് പ്രസിഡന്റ് മിനി വിനയൻ, വൈസ് പ്രസിഡന്റ് സിബി സുരേഷ്, ജില്ലാ പഞ്ചായത്ത് അംഗം അഡ്വ. ജോസഫ് ടാജറ്റ്, വിദ്യാഭ്യാസ ഉപഡയറക്ടർ ടി.വി. മദനമോഹൻ എന്നിവർ പങ്കെടുത്തു.
ഗാനാമൃതം ചൊരിഞ്ഞ് കളക്ടർ
വിദ്യാർത്ഥികൾക്ക് നന്മയുടെയും, സ്നേഹത്തിന്റെയും ശാന്തിയുടെയും സന്ദേശം നൽകുന്ന വരികൾ പാടി പ്രവേശനോത്സവ വേദിയെ പൂർണമാക്കി കളക്ടർ ഹരിത വി. കുമാർ. അമ്മാടം സെന്റ് ആന്റണീസ് ഹയർ സെക്കൻഡറി സ്കൂളായിരുന്നു വേദി. ജില്ലാ പഞ്ചായത്ത് പ്രസിഡന്റ് പി. കെ ഡേവിസ് മാസ്റ്ററുടെ പ്രത്യേക ആവശ്യ പ്രകാരമാണ് കുരുന്നുകൾക്കായി കളക്ടർ പാടിയത്. അപ്രതീക്ഷിതമായുള്ള കളക്ടറുടെ ഗാനം സദസിലും കൗതുകമുണർത്തി.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |