വിദേശനാണ്യ കരുതൽ ശേഖരം 325 മില്യൺ ഡോളർ ഇടിഞ്ഞു

മുംബയ്: ഇന്ത്യയുടെ വിദേശനാണ്യ കരുതൽ ശേഖരം 325 മില്യൺ ഡോളർ ഇടിഞ്ഞ് 560.942 ബില്യൺ ഡോളറായി കുറഞ്ഞു. ഫെബ്രുവരി 24 വരെയുള്ള കണക്കാണിതെന്ന് റിസർവ് ബാങ്ക് ഒഫ് ഇന്ത്യ അറിയിച്ചു. മൊത്തം കരുതൽ ശേഖരം കഴിഞ്ഞയാഴ്ച 5.68 ബില്യൺ ഡോളർ കുറഞ്ഞ് 561.267 ബില്യണിലെത്തി. 2021 ഒക്ടോബറിൽ ഇത് എക്കാലത്തെയും ഉയർന്ന നിലയിൽ എത്തിയിരുന്നു. 645 ബില്യൺ ആയിരുന്നു അപ്പോഴത്തെ നില. ആഗോള ചലനങ്ങൾ കാരണം രൂപയുടെ മൂല്യം കുറയുന്നത് പ്രതിരോധിക്കാൻ സെൻട്രൽ ബാങ്ക് വിവിധ നടപടികൾ സ്വീകരിച്ചതാണ് കരുത‍ൽ ശേഖരം കുറയാനുള്ള കാരണം. ഫെബ്രുവരി 24ന് അവസാനിച്ച ആഴ്ചയിൽ കരുതൽ ശേഖരത്തിന്റെ പ്രധാന ഘടകമായ വിദേശ കറൻസി ആസ്തി 166 മില്യൺ ഡോളർ കുറഞ്ഞ് 495.906 ബില്യൺ ഡോളറായെന്ന് റിസർവ് ബാങ്ക് പുറത്തുവിട്ട പ്രതിവാര സ്റ്റാറ്റിസ്റ്രിക്കൽ റിപ്പോർട്ടിൽ വ്യക്തമാക്കി.