ഛത്തീസ്ഗഢിൽ കുഴിബോംബ് നീക്കുന്നതിനിടെ സ്ഫോടനം, നാല് ജവാൻമാർക്ക് വീരമൃത്യു
റായ്പൂർ: ഛത്തിസ്ഗഡിലെ കാങ്കറിൽ കുഴിബോംബ് നീക്കം ചെയ്യുന്നതിനിടെ ഉണ്ടായ സ്ഫോടനത്തിൽ നാലു ജവാൻമാർക്ക് വീരമൃത്യു. കാങ്കർ - നാരായൺപുർ അതിർത്തിക്ക് സമീപമാണ് സംഭവം. മാവോയിസ്റ്റുകൾ മുൻപ് സ്ഥാപിച്ചിരുന്ന കുഴിബോംബുകൾ നിർവീര്യമാക്കുന്നതിനിടെ പൊട്ടിത്തെറിക്കുകയായിരുന്നു. ഓപ്പറേഷന് നേതൃത്വം നൽകിയ ജില്ലാ റിസർവ് ഗാർഡിലെ ഇൻസ്പെക്ടർ സുഖ്റാം വട്ടി, കോൺസ്റ്റബിൾ കൃഷ്ണ കൊമ്ര, ബസ്തർ ഫൈറ്റേഴ്സിലെ സഞ്ജയ് ഗഡ്പാല എന്നിവർ സംഭവസ്ഥലത്ത് തന്നെ വീരമൃത്യു വരിച്ചു. പരിക്കേറ്റ മറ്റൊരു കോൺസ്റ്റബിളായ ബസ്തർ ഫൈറ്റേഴ്സിലെ പരർമാനന്ദ കൊമ്രയെ ആളുപത്രിയിലെത്തിച്ചെങ്കിലും ചികിത്സയ്ക്കിടെ മരിച്ചു.
നാരായൺപൂർ ജില്ലാ അതിർത്തിയോട് ചേർന്നുള്ള ആദ്നാർ ഗ്രാമത്തിനടുത്തുള്ള വനപ്രദേശത്ത് രാവിലെ 11.30 ഓടെയാണ് സംഭവം. മേഖലയിലെ മാവോയിസ്റ്റ് താവളങ്ങളെക്കുറിച്ചുള്ള ഇന്റലിജൻസ് വിവരങ്ങളുടെ അടിസ്ഥാനത്തിൽ ഡി.ആർ.ജി ഉദ്യോഗസ്ഥർ, ബസ്തർ ഫൈറ്റേഴ്സ്, ജില്ലാ സേനാ അംഗങ്ങൾ എന്നിവരടങ്ങുന്ന സംയുക്ത സംഘം കുഴിബോംബ് നീക്കം ചെയ്യുകയായിരുന്നു. ആദ്യം ഒരു സ്ഥലത്ത് കുഴിബോംബുകൾ സംഘം കണ്ടെടുത്ത് നീർവീര്യമാക്കിയിരുന്നു. 11.30ഓടെ ഐ.ഇ.ഡി അടങ്ങിയ മറ്റൊരു ശേഖരം കണ്ടെത്തി. അത് നിർവീര്യമാക്കാൻ ശ്രമിക്കുന്നതിനിടെ പൊട്ടിത്തെറിക്കുകയായിരുന്നു. സ്ഥലത്ത് ഫോറൻസിക്, ബാലിസ്റ്റിക് പരിശോധനകൾ നടന്നുവരികയാണ്.