ആറ്റുകാൽ പൊങ്കാല: നിർദ്ദേശങ്ങളുമായി മലിനീകരണ നിയന്ത്രണ ബോർഡ്

തിരുവനന്തപുരം: ആറ്റുകാൽ പൊങ്കാലയുമായി ബന്ധപ്പെട്ട് പരിസ്ഥിതി സംരക്ഷണത്തിൽ ശ്രദ്ധിക്കേണ്ട കാര്യങ്ങളിൽ സംസ്ഥാന മലിനീകരണ നിയന്ത്രണ ബോർഡ് നിർദ്ദേശങ്ങൾ നൽകി. പൊങ്കാല സാമഗ്രികൾ പൊതിഞ്ഞ് കവറുകളിലും കൊണ്ടുവരുമ്പോൾ ഗ്രീൻ പ്രോട്ടോക്കോൾ പാലിക്കണം. ഉച്ചഭാഷിണികളും മറ്റ് ശബ്ദോപകരണങ്ങളും പ്രവർത്തിപ്പിക്കുന്നതിൽ പൊതുജനങ്ങളുടെ പരാതിയിന്മേൽ പൊലീസ് ബോർഡിന്റെ സഹായം ആവശ്യപ്പെടുന്ന ഘട്ടങ്ങളിൽ തത്സമയം ശബ്ദപരിധി അളന്ന് കൈമാറും. പൊങ്കാല കലത്തിന്റെ ഗുണനിലവാരത്തെക്കുറിച്ച് വ്യക്തത വരുത്തുന്നതിനായി കോർപ്പറേഷൻ എൻ.ഐ.എസ്.ടിയുമായി സഹകരിച്ച് നടപടി കൈക്കൊള്ളും. പൊങ്കാല ദിവസത്തിന് മുൻപും അന്നേദിവസവും ശേഷവും അന്തരീക്ഷ ഗുണനിലവാരം പരിശോധിക്കും. പൊങ്കാല പരിസ്ഥിതി സൗഹൃദമാക്കാൻ സാങ്കേതിക വിഭാഗം ഉദ്യോഗസ്ഥർ ഉൾപ്പെട്ട സ്ക്വാഡിനെ ജില്ലാ ഓഫീസറുടെ നേതൃത്വത്തിൽ രൂപീകരിച്ചു.