നഗരത്തിൽ 58 പിടികിട്ടാപ്പുള്ളികൾ പിടിയിൽ

തിരുവനന്തപുരം: സിറ്റി പൊലീസ് നടത്തിയ സ്‌പെഷ്യൽ ഡ്രൈവിൽ പിടികിട്ടാപ്പുള്ളികളായ 58 പേരെ പിടികൂടി. വിവിധ ക്രിമിനൽ
കേസുകളിൽ ഉൾപ്പെട്ട് ജാമ്യത്തിലിറങ്ങിയ ശേഷം വിചാരണയ്ക്ക് ഹാജരാകാതെ ദീർഘ നാളായി ഒളിവിൽ പോയതിന് കോടതി എൽ.പി വാറണ്ട് പുറപ്പെടുവിച്ച പ്രതികളെയാണ് വിവിധ സ്റ്റേഷനുകളിലായി അറസ്റ്റ് ചെയ്തത്. കന്റോൺമെന്റ് സബ് ഡിവിഷനിലുൾപ്പെട്ട വിവിധ പൊലീസ് സ്റ്റേഷനുകളിലായി ക്രിമിനൽ കേസുകളിലുൾപ്പെട്ട 12 പേരും, ഫോർട്ട് സബ്ബ് ഡിവിഷനിൽ 19 പേരും ശംഖുംമുഖം സബ് ഡിവിഷനിൽ 11 പേരും സൈബർ സിറ്റി സബ് ഡിവിഷനിലെ 16 പിടികിട്ടാപ്പുള്ളികളുമാണ് പിടിയിലായാത്. ഏറ്റവും കൂടുതൽ പ്രതികളെ പിടികൂടിയത് മെഡിക്കൽ കോളേജ്, ഫോർട്ട് പോലീസ് സ്റ്റേഷനുകളിലാണ്. വരും ദിവസവും ഡ്രൈവ് തുടരുമെന്ന് സിറ്റി പൊലീസ് കമ്മിഷണർ സി.എച്ച്. നാഗരാജു അറിയിച്ചു.