പുസ്തകങ്ങളിൽ നിന്നല്ല കാര്യങ്ങൾ മനസിലായതെന്ന് പറഞ്ഞ ഇന്നസെന്റിന്റെ പുസ്തകം പിന്നീട് കുട്ടികൾക്ക് പാഠപുസ്തകമായി
എട്ടാംക്ളാസ് വരെയേ പഠിച്ചിട്ടുള്ളുവെങ്കിലും മലയാളസിനിമയിലെ ഏറ്റവും വിദ്യാസമ്പന്നൻ ഇന്നസെന്റാണെന്ന് സത്യൻ അന്തിക്കാട് പറഞ്ഞിട്ടുണ്ട്. ഒരിക്കൽ കൗമുദി ടിവിയിലെ ഒരു ഇന്റർവ്യൂവിൽ തന്റെ സ്കൂൾ പഠന കാലത്തെകുറിച്ചുള്ള ഓർമ്മകൾ അദ്ദേഹം സന്തോഷ് ജോർജ് കുളങ്ങരയുമായി പങ്കുവച്ചിരുന്നു. പരീക്ഷയ്ക്ക് ശേഷം ചോദ്യങ്ങൾക്കുള്ള ഉത്തരം കാണാതെ പഠിച്ച് വീട്ടിൽ സഹോദരങ്ങൾ ചോദിക്കുമ്പോൾ മണിമണി പോലെ പറയുന്നത് അദ്ദേഹം തമാശയോടെ പങ്കുവച്ചു. പുസ്തകങ്ങളിൽ നിന്നല്ല താൻ കാര്യങ്ങൾ പഠിച്ചതെന്നും അദ്ദേഹം പറയുന്നു. പിൽക്കാലത്ത് അദ്ദേഹത്തിന്റെ പുസ്തകം കുട്ടികൾക്ക് പാഠപുസ്തകമാകുമെന്ന് ഒരിക്കലും കരുതിയിരുന്നില്ലെന്നും അദ്ദേഹം വ്യക്തമാക്കി.
സ്കൂളിൽ തന്നെ വൈലോപ്പിള്ളി ശ്രീധരമേനോൻ പഠിപ്പിച്ചിരുന്നു എന്നും അഭിമാനത്തോടെ അദ്ദേഹം ഓർക്കുന്നു. വൈലോപ്പിള്ളിയുടെ ശിഷ്യനാണെന്ന് പറയുമ്പോൾ മമ്മൂട്ടി, മോഹൻലാൽ, ദിലീപ് തുടങ്ങിയവർക്കൊക്കെ ഒരു മാനസിക വിഷമമുണ്ടെന്നും അവർക്കൊന്നും അതിന് കഴിഞ്ഞിട്ടില്ലെന്ന വിഷമമാണെന്നും ഇന്നസെന്റ് തമാശയോടെ ഓർമ്മിക്കുന്നു.