ജില്ലയിൽ ആറ് സ്മാർട്ട് വില്ലേജ് ഓഫീസുകൾ കൂടി 

തിരുവനന്തപുരം: ജില്ലയിൽ പുതുതായി നിർമ്മിച്ച ആറു സ്മാർട്ട് വില്ലേജ് ഓഫീസ് കെട്ടിടങ്ങൾ ഇന്ന് തുറക്കും. നെടുമങ്ങാട് താലൂക്കിലെ വിതുര, തിരുവനന്തപുരം താലൂക്കിലെ കുടപ്പനകുന്ന്, കാട്ടാക്കട താലൂക്കിലെ മണ്ണൂർക്കര, അമ്പൂരി, നെയ്യാറ്റിൻകര താലൂക്കിലെ വെള്ളറട, കൊല്ലയിൽ എന്നീ സ്മാർട്ട് വില്ലേജ് ഓഫീസുകളാണ് റവന്യൂ വകുപ്പ് മന്ത്രി കെ. രാജൻ ഉദ്ഘാടനം ചെയ്യുന്നത്. 44 ലക്ഷംവീതം മുടക്കി ആധുനിക സൗകര്യങ്ങളോടെയാണ് കെട്ടിടങ്ങളുടെ നിർമ്മാണം. ഫ്രണ്ട് ഓഫീസ്, കാത്തിരിപ്പ് കേന്ദ്രം, ഇരിപ്പിട കുടിവെള്ള സൗകര്യം, ഭിന്നശേഷി സൗഹൃദ ടോയ്ലെറ്റ് സൗകര്യം എന്നിവയും സജ്ജീകരിച്ചിട്ടുണ്ട്. കുടപ്പനകുന്ന് സ്മാർട്ട് വില്ലേജിന്റെ ഉദ്ഘാടനം രാവിലെ 11ന് വി.കെ പ്രശാന്ത് എം.എൽ.എയുടെ അദ്ധ്യക്ഷതയിലും വിതുര, മണ്ണൂർക്കര ഓഫീസുകളുടെ ഉദ്ഘാടനം ജി.സ്റ്റീഫൻ എം.എൽ.എയുടെ അദ്ധ്യക്ഷതയിൽ ഉച്ചയ്ക്ക് രണ്ടിനും മൂന്നിനും നടക്കും. സി.കെ. ഹരീന്ദ്രൻ എം.എൽ.എയുടെ അദ്ധ്യക്ഷതയിൽ യഥാക്രമം വൈകിട്ട് നാലിനും അഞ്ചിനും ആറിനുമാണ് അമ്പൂരി, വെള്ളറട, കൊല്ലയിൽ സ്മാർട്ട് വില്ലേജ് ഓഫീസുകളുടെ ഉദ്ഘാടനം.