മറ്റൊന്നും വേണ്ട! ഈ കള്ളന്മാർ ലക്ഷ്യമിടുന്നത് വീടിന് മുന്നിലുള്ള ഗേറ്റ് മാത്രം; പരിഭ്രാന്തരായി നാട്ടുകാർ

മുളങ്കുന്നത്തുകാവ്: പട്ടാപ്പകൽ വീടുകളിലെ ഇരുമ്പ് ഗേറ്റ് മോഷ്ടിച്ചു കടത്തിയ രണ്ട് പ്രതികൾ അറസ്റ്റിൽ. രാവിലെ ജോലിക്ക് പോയി തിരികെ വീട്ടിലെത്തിയപ്പോൾ വീടിന് മുന്നിൽ ഗേറ്റുകളില്ലാത്തത് വീട്ടുകാരെ പരിഭ്രാന്തിയിലാക്കി. ഒളരിക്കര ശാന്തിനഗറിൽ കോലാടി വീട്ടിൽ ഷിജോ ( 31), നെല്ലിക്കുന്ന് തുണ്ടപ്പറമ്പിൽ ബിനോയ് ( 36) എന്നിവരെയാണ് മെഡിക്കൽ കോളേജ് എസ്.എച്ച്.ഒ പി.പി.ജോയ് അറസ്റ്റ് ചെയ്തത്.

ഇന്നലെ ഉച്ചയോടെയാണ് വിചിത്രമായ സംഭവം നടന്നത്. മുളങ്കുന്നത്തുകാവ് വെളപ്പായ റോഡ് എന്നിവിടങ്ങളിൽ നിന്ന് ആൾത്താമസമുള്ള വീടിന് മുൻവശം ഉറപ്പിച്ചിരുന്ന ഇരുമ്പ് ഗേറ്റുകൾ ഓട്ടോയിൽ വന്ന രണ്ടംഗ സംഘം കയറ്റിക്കൊണ്ടുപോകുകയായിരുന്നു. മെഡിക്കൽ കോളേജ് പൊലീസിന്റെ നേതൃത്വത്തിലുള്ള അന്വേഷണ സംഘമാണ് മോഷണം നടന്ന് മണിക്കൂറുകൾക്കുള്ളിൽ പ്രതികളെ കണ്ടെത്തിയത്. സി.സി.ടി.വിയിലെ ദൃശ്യം പരിശോധിച്ചാണ് പൊലീസ് പ്രതികളിലേക്കെത്തിയത്. ഇവർ സഞ്ചരിച്ച ഓട്ടോയും പൊലീസ് കസ്റ്റഡിയിലെടുത്തു. ഗേറ്റുകൾ പട്ടാമ്പിയിലെ ആക്രിക്കടയിൽ നിന്നും കണ്ടെടുത്തു. പ്രതികൾ മുമ്പും സമാനരീതിയിലുള്ള മോഷണം നടത്തിയിട്ടുണ്ടെന്ന് പൊലീസ് പറഞ്ഞു.

അന്വേഷണ സംഘത്തിൽ എസ്.ഐ ബാലസുബ്രഹ്മണ്യൻ, എസ്.ഐ ശിവദാസൻ, പൊലീസുകാരായ അഖിൽ, വിഷ്ണു, അഭീഷ്, രൻജിത് എന്നിവരുമുണ്ടായിരുന്നു.