ഗഗൻയാൻ പരീക്ഷണ വിക്ഷേപണം വിജയം, ക്രൂ എസ്കേപ്പ് മൊഡ്യൂൾ സുരക്ഷിതമായി ബംഗാൾ ഉൾക്കടലിൽ ഇറക്കി
ശ്രീഹരിക്കോട്ട: ഇന്ത്യക്കാരനെ ബഹിരാകാശത്തെത്തിക്കാനുള്ള ദൗത്യമായ ഗഗൻയാന്റെ ആദ്യ ആകാശ പരീക്ഷണ വിക്ഷേപം വിജയം. പരീക്ഷണം വിജയമാണെന്ന് ഐ എസ് ആർ ഒ ചെയർമാൻ എസ് സോമനാഥ് അറിയിച്ചു. ഒൻപത് മിനിട്ട് 51 സെക്കന്റിലാണ് പരീക്ഷണം വിജയകരമായി പൂർത്തിയാക്കിയത്. ക്രൂ മൊഡ്യൂൾ റോക്കറ്റിൽ നിന്ന് വേർപെടുത്തുകയും ഇത് കൃത്യമായി ബംഗാൾ ഉൾക്കടലിൽ ഇറക്കുകയും ചെയ്തു.
ഈ വിജയം ചരിത്ര നേട്ടത്തിലേക്കുള്ള ആദ്യ പടിയാണെന്ന് ഐ എസ് ആർ ഒ പ്രതികരിച്ചു. ആദ്യമുണ്ടായ സാങ്കേതിക തകരാർ തിരിച്ചറിയാനും വളരെ എളുപ്പത്തിൽ പരിഹരിക്കാനും സാധിച്ചെന്ന് എസ് സോമനാഥ് അറിയിച്ചു.
ഇന്ന് രാവിലെ എട്ട് മണിക്ക് നടത്താനിരുന്ന ക്രൂ എസ്കേപ്പ് സിസ്റ്റം പരീക്ഷണ വിക്ഷേപണമാണ് സാങ്കേതിക തകരാറിനെത്തുടർന്ന് മാറ്റിവച്ചത്. തുടർന്ന് അൽപം മുമ്പ് പരീക്ഷണം വീണ്ടും ആരംഭിക്കുകയായിരുന്നു.
"ടെസ്റ്റ് വെഹിക്കിൾ അബോർട്ട് മിഷൻ (ടി.വിഡി.1 ഉയർത്താനുള്ള ശ്രമം ഇന്ന് നടന്നില്ല. എട്ട് മണിക്ക് നിശ്ചയിച്ചിരുന്ന വിക്ഷേപണം കാലവസ്ഥ പ്രതികൂലമായതിനാൽ 8.45 ലേക്ക് മാറ്റിവച്ചിരുന്നു. റോക്കറ്റിനെ ഉയർത്താനുള്ള ഓട്ടോമാറ്റിക് ലോഞ്ച് സിസ്റ്റം സുഗമമായി ആരംഭിക്കുകയും ചെയ്തു. എന്നാൽ വിക്ഷേപണത്തിനായുള്ള ജ്വലന പ്രകിയ സുഗമമായി നടന്നില്ല. ഇതിനാൽ ഷെഡ്യൂൾ ചെയ്ത ലിഫ്റ്റ് ഓഫിന് അഞ്ച് സെക്കൻഡ് മുമ്പ് വിക്ഷേപണം നിർത്തിവയ്‌ക്കേണ്ടിവന്നു."- എന്നായിരുന്നു ഐ എസ് ആർ ഒ ചെയർമാൻ സോമനാഥ് നേരത്തെ അറിയിച്ചത് .
ദൗത്യമാതൃകയിൽ തയ്യാറാക്കിയ റോക്കറ്റും സഞ്ചാരികളുടെ പേടകവും ഭൂമിയിൽ നിന്ന് 17കിലോമീറ്റർ ഉയരത്തിലെത്തിച്ച് പുറത്തേക്ക് തള്ളിയിടുകയും, സുരക്ഷിതമായി താഴെ എത്തിക്കുകയുമാണ് ചെയ്‌തത്. മനുഷ്യപേടകം ബഹിരാകാശത്ത് എത്തിയശേഷം അപകടമുണ്ടായാൽ സഞ്ചാരികളെ സുരക്ഷിതരായി ഭൂമിയിൽ എത്തിക്കുന്ന സംവിധാനമായ ക്രൂ എസ്കേപ്പ് സിസ്റ്റത്തിന്റെ ആദ്യ പരീക്ഷണമാണിത്.
ദൗത്യത്തിനായി വികസിപ്പിച്ചെടുത്ത സിംഗിൾ സ്റ്റേജ് ലിക്വിഡ് റോക്കറ്റും ക്രൂ മൊഡ്യൂൾ (സി.എം), ക്രൂ എസ്‌കേപ് സിസ്റ്റം (സി.ഇ.എസ്) എന്നിവയാണ് ഇന്ന് പരീക്ഷിക്കുന്നത്. ക്രൂ എസ്‌കേപ് സിസ്റ്റത്തിന്റെ ഭാഗമായ ഡ്രോഗ് പാരച്യൂട്ടിന്റെ പരീക്ഷണം ഓഗസ്റ്റിൽ ചണ്ഡീഗഡിലും സർവീസ് മൊഡ്യൂൾ പ്രൊപ്പൽഷൻ സംവിധാനത്തിന്റെ (എസ്.എം.പി.എസ്) രണ്ടു പരീക്ഷണങ്ങളും സർവീസ് മൊഡ്യൂൾ പ്രൊപ്പൽഷൻ സിസ്റ്റത്തിന്റെ പരീക്ഷണം ജൂലായിൽ മഹേന്ദ്രഗിരിയിലും പൂർത്തിയാക്കിയിരുന്നു. 2025ലാണ് ഗഗൻയാൻ വിക്ഷേപിക്കുന്നത്.