കടുവയുടെ കൂട്ടിനുള്ളിൽ യുവാവിന്റെ മൃതദേഹം

ലാഹോർ: പാകിസ്ഥാനിലെ പഞ്ചാബ് പ്രവിശ്യയിൽ മൃഗശാലയിൽ കടുവയുടെ കൂട്ടിനുള്ളിൽ യുവാവിനെ മരിച്ച നിലയിൽ കണ്ടെത്തി. ബഹവൽപൂരിലെ ഷെർബാഗ് മൃഗശാലയിലാണ് സംഭവം. ബുധനാഴ്ച രാവിലെ മൂന്ന് കടുവകളിൽ ഒന്ന് ഷൂ കടിച്ചുപിടിച്ചിരിക്കുന്നത് ശ്രദ്ധയിൽപ്പെട്ട മൃഗശാല അധികൃതർ പരിശോധന നടത്തിയ​പ്പോഴാണ് യുവാവിന്റെ മൃതദേഹം കണ്ടെത്തിയത്. യുവാവ് എങ്ങനെയാണ് കൂട്ടിനുള്ളിൽ കയറിതെന്ന് വ്യക്തമല്ല. മൃതദേഹത്തിന് ഏതാനും മണിക്കൂർ പഴക്കമുണ്ട്. യുവാവിന്റെ കാലിൽ ഗുരുതരമായി മുറിവേറ്റിട്ടുണ്ട്. കൊല്ലപ്പെട്ട ആളെ തിരിച്ചറിഞ്ഞിട്ടില്ലെന്നും മൃതദേഹത്തിനായി കുടുംബാംഗങ്ങളാരും എത്തിട്ടില്ലെന്നും അധികൃതർ പറഞ്ഞു. സംഭവത്തിന് പിന്നാലെ മൃഗശാല താത്കാലികമായി അടച്ചു. പൊലീസ് അന്വേഷണം ആരംഭിച്ചു. 2000ത്തിൽ പാകിസ്ഥാനിൽ കാണാതായ ഒരു ആൺകുട്ടിയുടെ മൃതദേഹം ഒരു മൃഗശാലയിലെ സിംഹത്തിന്റെ കൂടിനുള്ളിൽ നിന്ന് കണ്ടെത്തിയത് വാർത്തകളിൽ നിറഞ്ഞിരുന്നു.